2019 GC6 աստղակերպը, որը 15-ից մինչեւ 30 մետր տրամագիծ ունի, հինգշաբթի անցել է Երկրից 219 հազար կմ հեռավորությամբ, որը 2 անգամ ավելի մոտ է, քան Երկրի եւ Լուսնի միջեւ միջին հեռավորությունն է: Space.com պորտալը, վկայակոչելով NASA-ի մասնագետներին, հայտնել է, որ այս աստղակերպը դասվում է Երկրի համար «պոտենցիալ» վտանգավորների շարքին: Այս խմբի մեջ են մտնում երկնային մարմինները, որոնք մեր մոլորակին են մոտենում 8 մլն կմ-ից մոտ հեռավորությամբ եւ բավականին զանգվածեղ են ընկնելու դեպքում լուրջ վնաս հասցնելու համար, փոխանցում է ՏԱՍՍ-ը:
Երկնային մարմինը, որը ստացել է 2019 GC6 նշումը, ապրիլի 9-ին հայտնաբերվել է Catalina Sky Survey ծրագրի շրջանակում՝ Թաքսոն քաղաքի մերձակայքում (Արիզոնա նահանգ) աստղադիտակով դիտարկումների ժամանակ: Փասադենայում (Կալիֆոռնիա նահանգ) Ռեակտիվ շարժման լաբորատորիայի փորձագետների գնահատմամբ՝ Երկրին աստղակերպի առավել մոտենալու պահին նրա արագությունը հասել է 20,3 հազար կմ/ժամի:
Աստղագետները փետրվարին հայտնաբերել էին 2 աստղակերպ, որոնք Երկրից ավելի մոտ էին անցել: Փետրվարի 11-ին 2019 CN5 աստղակերպն անցել էր մեր մոլորակից 118,2 հազար կմ հեռավորությամբ, իսկ փետրվարի 15-ին 2019 CS5 աստղակերպը՝ 400 հազար կմ հեռավորությամբ: Այս աստղակերպը եւս մեկ անգամ Երկրին կմոտենա սեպտեմբերի 9-ին, սակայն այդ ժամանակ կլինի 63 մլն կմ հեռավորության վրա:
NASA-ի գնահատմամբ՝ մերձերկրային տարածքում կարող են լինել մոտ 17 հազար դեռեւս չհայտնաբերված աստղակերպներ:
NASA-ն 2021 թվականի հոկտեմբերին նախատեսում է արձակել Lucy ավտոմատ կայանը՝ հետազոտելու համար Արեգակնային համակարգի CTVB աստղակերպները: 2025 թվականի ապրիլին Մարսի եւ Յուպիտերի միջեւ աստղակերպների գոտում այն պետք է մոտենա Դոնալդջոհանսոն աստակերպին, որը հայտնաբերվել է 1981 թվականի մարտին: Այնուհետեւ՝ 2027-2028 թվականներին «Լյուսին» կթռչի տարբեր ձեւերի աստղակերպներ Էվրիբաթի, Պոլինելայի, Լեւկի եւ Օրի շուրջը: Դրանից բացի 2033 թվականին զոնդը պետք է ուսումնասիրի Պատրոկլ-Մենետիում բինարային աստղակերպը:
