Nord Stream 2 ընկերությունը՝ «Հյուսիսային հոսք-2» գազամուղի օպերատորը ԵՄ-ին դատաքննությամբ է սպառնում, եթե իրեն չազատեն ԵՄ երրորդ էներգետիկ փաթեթի պահանջներից:
Այս մասին գրում է Politico-ն՝ վկայակոչելով նամակին, որը Nord Stream 2 AG-ի գործադիր տնօրեն Մատիաս Վարնիգը ապրիլի 2-ին ուղարկել էր Եվրահանձնաժողովի նախագահ Ժան Կլոդ Յունկերին:
Վարնիգը մասնավորապես զգուշացնում է, որ Գազային դիրեկտիվում կատարվող փոփոխությունների տարածումը Nord Stream 2-ի վրա կարող է խախտել Էներգետիկ խարտիան՝ փաստաթուղթ, որն ընդունվել է 1994-ին եւ միավորում է 56 երկրների, հաղորդում է DW-ն:
«Հյուսիսային հոսք-2»-ը, որով Ռուսաստանից գազը նախատեսում են Գերմանիա մատակարարել Բալթիկ ծովի հատակով, զգալիորեն կընդլայնի Եվրոպայի հնարավորությունները գազամատակարարման ոլորտում եւ թույլ կտա 13 տոկոսվ նվազեցնել կապույտ վառելիքի գինը, նշում է Վարնիգը:
Նա նաեւ նշում է, որ գազամուղի շինարարությունը եւ շահագործումը, սպասվում է, որ ավելի քան 31,000 աշխատատեղ եւ ԵՄ ՀՆԱ-ին 5 միլիարդ եվրո կբերի: Nord Stream 2-ի նկատմամբ գազային դիրեկտիվի պահանջների կիրառումը սահմանափակելու է ընկերության հնարավորությունները որպես ներդրողի, ասում է Վարնիգը:
