Հարկ է մոռանալ մարդկանց, որոնք, քաղաքականության մեջ լինելով, հրաժարական են տվել եւ պատմության մասը դարձել: Այս մասին ապրիլի 25-ին ԱԺ-ում ավանդական ճեպազրույցների ժամանակ ասաց «Լուսավոր Հայաստան» կուսակցության եւ խորհրդարանական խմբակցության ղեկավար Էդմոն Մարուքյանը՝ պատասխանելով երկրի երրորդ նախագահ Սերժ Սարգսյանի հայտարարությունը մեկնաբանելու խնդրանքին:
Ընդ որում՝ Մարուքյանին զայրացրել էր այն, որ, իր կարծիքով, լրագրողները կեղծ օրակարգ եւ կեղծ տպավորություն են ձեւավորում այն մասին, թե Սերժ Սարգսյանի հայտարարությունը ինչ-որ նշանակություն ունի եւ որեւէ մեկին հետաքրքիր է: Նրա խոսքով՝ Հայաստանի Հանրապետական կուսակցությունը, որը նախկինում իշխանության էր, անցած ընտրություններին անգամ չկարողացավ խորհրդարան անցնելու համար անհրաժեշտ խոչընդոտը հաղթահարել: «Նա (Սերժ Սարգսյանը – խմբ.) ի՞նչ պետք է ասի: Ի՞նչ եք նրան հարցնում: Ցանկանում եք իմանալ, թե ինչ օրակա՞րգ ունեն: Նա ի՞նչ պետք է ասի: Որ Երեւանի կենտրոնում մանկապարտեզնե՞րն են սեփականաշնորհել: Նա պետք է այդ հարցի՞ն պատասխանի: Թե՞ այն հարցին, որ պաշտպանության նախարար ունեինք, որը միաժամանակ Ռուսաստանի քաղաքացի էր»,- դժգոհեց վրդովված Մարուքյանը: