Քսաներկու մարդ է անհետ կորել նավի խորտակման հետեւանքով, որը վենեսուելական Սուկրե նահանգի Գուիրիա քաղաքից անօրինական ուղեւորվել էր Տրինիդադ եւ Տոբագո՝ հայտնում է ՌԻԱ Նովոստին։

Ավելի վաղ վենեսուելական Nacional թերթը հայտարարել էր 33 մարդու կորստի մասին։ «Էլ Ջոնաթան» նավը Պարիա ծոցում Պատոս կղզու մոտ ուժեղ քամուց շրջվել էր։ Ոստիկանության տվյալներով, Գուիրիայից դուրս գալիս նավի տախտակամածին 24 մարդ էր եղել։ Առայժմ տեղեկություն կա միայն երկու մարդու փրկվելու մասին, որոնք չեն տուժել։

Փրկարարները փնտրում են մնացած ուղեւորներին։ Թերթը նշում է, որ հավանաբար նավի վրա ավելի շատ բեռ է եղել, քան այն կարող էր տանել։