«Լուսավոր Հայաստան» խմբակցության ղեկավար Էդմոն Մարուքյանը չի կարծում, որ Արցախի հարցում բանակցությունները լճացած վիճակում են: «Ես չէի շտապի ասել իրավիճակը լճացած է, կան բանակցություններ»,- այս մասին Եռաբլուրում լրագրողների հետ զրույցում ասաց Մարուքյանը՝ հավելելով. «Իրավիճակն այնպիսին է, որ չի եղել ընդունելի լուծում մեզ համար: Չեմ ուզում Ադրբեջանի կողմը քննարկել, քանի դեռ հայկական կողմի համար դեռ ընդունելի լուծում չի եղել: Խնդիրը լուծելու մասին դեռ վաղ է խոսել, պետք է հզորանալ, տնտեսությունը զարգացնել, թիկունքը, առաջնագիծը ուժեղացնել, պայմանագրայինների թիվն ավելացնել, շատ վճարել զինվորականներին, սոցիալական ապահովության հարցը լուծել, ուժեղանալ օր-օրի: Խնդրի լուծման մասին կարելի է խոսել ամեն օր եւ մոռանալ, որ խախտված ռազմաքաղաքական բալանսը պետք է վերականգնել»:
Հարցին՝ որքանո՞վ է հնարավոր, որ Արցախը վերադառնա բանակցությունների սեղան, Մարուքյանն ասաց. «Այդ հարցը օրակարգում է, կարծում եմ: Իրատեսական կհամարեմ, եթե մենք լավ աշխատանք տանենք միջազգային հանրության հետ: Ադրբեջանն առանձին վերցրած չի ասելու՝ թող Արցախը վերադառնա: Պետք է միջազգային հանրությունը ձեւավորի այդ կարծիքը, որ դա լինի «անքննարկելի» հարց եւ այդ պարագայում Արդբեջանը չի կարող ասել՝ չէ»:
Ըստ Մարուքյանի՝ Հայաստանի արտաքին գերատեսչությունը, մեր դիվանագիտական կորպուսը պետք է օրնիբուն աշխատեն, որ Արցախի հարցում միջազգային հանրությունը ունենա ձեւավորված կարծիք: