Կառավարությունն իր այսօրվա՝ մայիսի 10-ի նիստում որոշում կայացրեց Տավուշի մարզի Լճկաձոր համայնքի տարածքում, Վանաձոր-Բագրատաշեն Մ-6 միջպետական ավտոճանապարհի 86-րդ կմ եւ Լոռու մարզի Մարց-Աթան ավտոճանապարհի 25-րդ կմհատվածներում ակտիվացած սողանքային եւ քարաթափման երեւույթների ուսումնասիրման եւ կանխարգելիչ միջոցառումների վերաբերյալ հիմնավոր առաջարկություններ ներկայացնելու նպատակով պահուստային ֆոնդի հաշվից ԱԻՆ-ին հատկացնել 9,5 մլն դրամ:
Հարցը ներկայացրեց ԱԻ նախարար Ֆելիքս Ցոլակյանը: Նա նշեց, որ Վանաձոր-Բագրատաշեն Մ-6 միջպետական ավտոճանապարհի 80-րդ կմ-ում (Լճկաձոր բնակավայրի տարածքում) ակտիվացել են սողանքային երեւույթները եւ սպառնում են Մ-6 միջպետական ավտոճանապարհի երթեւեկությանը:
Նշված հատվածը հագեցած է մեքենանաերի մեծ ինտենսիվությամբ: Սողանքային սկարպից դուրս, սարահարթի հարավարեւմտյան եզրին գտնվող տեղամասում առկա են խոշոր, խիստ մասնատված ու անկայուն ժայռային բլոկներ՝ անջատված միմյանցից 10-15 սմ ճեղքերով:
Ժայռային բլոկները ցանկացած պահի կարող են ցած գլորվել` վտանգելով լանջի ստորոտով անցնող միջպետական ավտոճանապարհի երթեւեկությունը:
Միաժամանակ, Լոռու մարզի Մարց-Աթան հանրապետական նշանակության ավտոճանապարհի 25-րդ կմ-ում ակտիվացած սողանքը սպառնում է ստորոտով անցնող, Աթան համայնքը արտաքին աշխարհին կապող միակ Մ-6 հանրապետական ավտոճանապարհի երթեւեկությանը, որի փակվելու դեպքում Աթան համայնքը կունենա մեծ խնդիր: Մոտ 200 մետր երկարությամբ, 120 մետր լայնությամբ եւ 42 մետր բարձրությամբ անտառածածկ սողանքային մարմինը սկարպի հատվածում առանձնացել է լանջից մինչեւ 1 մետր: Սարալանջի վրա առկա են բազմաթիվ ճեղքեր, որոնց խորությունները հասնում են մինչեւ 6 եւ ավելի մետր, առկա են նաեւ թեքված եւ արմատախիլ եղած ծառեր:
Հաշվի առնելով ստեղծված վտանգավոր իրավիճակը՝ Ֆելիքս Ցոլակյանն ասաց, որ հնարավոր արտակարգ իրավիճակներից խուսափելու, բնակչությանը, ինչպես նաեւ երթեւեկությանը սպառնացող ռիսկերը նվազեցնելու նպատակով անհրաժեշտություն է առաջացել հնարավոր սեղմ ժամկետներում վերոնշյալ 2 տեղամասերում լիցենզավորված կազմակերպության կողմից իրականացնել ինժեներա-երկրաբանական, երկրաֆիզիկական եւ հիդրոերկրաբանական հետազոտություններ՝ կանխարգելիչ միջոցառումների վերաբերյալ հիմնավոր առաջարկություններ ներկայացնելու նպատակով:
Դրա համար նախարարությունը խնդրեց բյուջեից հատկացնել 4,44 մլն դրամ, Մարց-Աթան համայնք տանող հանրապետական ավտոճանապարհի համար 5,088 մլն դրամ:
Վարչապետ Նիկոլ Փաշինյանը հարց ուղղեց, թե ինչու մինչեւ հիմա ուսումնասիրություններ չեն արվել, մանավանդ այն պարագայում, որ Մ-6 միջպետական ճանապարհին այս պահին կապիտալ աշխատանքներ կատարվում են: Միեւնույն ժամանակ, վարչապետը անհետաձգելի է համարել անվտանգության մակարդակի բարձրացումը նշված ճանապարհահատվածներում:
Նիկոլ Փաշինյանը նշեց, որ չի կարելի ճանապարհ կառուցել, գնալ ժապավենը կտրել, հետո ժայռը փլվի, ճանապարհը ամիսներով փակվի. «Բա միլիարդներն ինչի՞ համար ծախսվեցին: Կամ ասենք, շենք կառուցենք, բլուրը փլվի, շենքն էլ տակը մնա: Բա շենքն ինչի՞ կառուցեցինք, դրա համար պետք է պատասխանատվություն լինի»:
