Գեղարքունիքի մարզում ընթացքի մեջ է տարածաշրջանի ամենամեծ՝ 55 մեգավատ հզորության արեւային էներգետիկ կայանի կառուցումը։ Այսօր Գեղարքունիքի մարզում ընթացող բիզնես համաժողովի ժամանակ ասաց Էներգետիկ ենթակառուցվածքների եւ բնական պաշարների փոխնախարար Հակոբ Վարդանյանը։
Նա նաեւ նշեց, որ Հայաստանն ունի այլընտրանքային էներգետիկայի երեք աղբյուր՝ ջրային, հողմային եւ արեւային, որոնք կարող են օգտագործվել արդյունաբերական նպատակներով։
Ըստ փոխնախարարի, ՀԷԿ–երի եւ ՓՀԷԿ–երի համակարգը Հայաստանում զարգացած է, անգամ սպառված, իսկ արեւային էներգիայի պոտենցիալը դեռեւս ամբողջությամբ օգտագործված չէ. Հայաստանը համարվում է միջինից բարձր արեւային պոտենցիալ ունեցող երկիր, մոտավորապես 1500–1800 ժամ արեւային օրեր, 13 լիցենզիաներից 8–ը հենց Գեղարքունիքի մարզում են, 2–ը՝ կառուցված։
«Գեղարքունիքի մարզում՝ շնորհիվ ամենամեծ արեւային պոտենցիալի, կան նաեւ այլ տարածքներ, որոնք կարող են ծառայել արեւային կայանների համար»,– տեղեկացրեց փոխնախարարը, հավելելով, որ մարզի արեւային կայանների կառուցման կարեւոր նախապայման է սառը եւ մաքուր օդը, տեղանքը եւ իհարկե արեւը։
Ինչ վերաբերում ոլորտի օրենսդրական կարգավորումներին, Հակոբ Վարդանյանը նշեց, որ էներգախնայողության ազգային ռազմավարության մշակման աշխատանքներն ընթանում են, ԵՄ–ն դրամաշնորհ է տրամադրել, կարգավորվելու է օրենսդրական դաշտը, հաշվի են առնվելու շինարարական նորմատիվները, արտադրվող եւ ներմուծվող սարքերի համար ընդունվելու են էներգախնայողության միջազգային ստանդարտներ եւ այլն։
«Համալիր փաթեթը 5–ից 8 տարվա ընթացքում ընդունված կլին»,– ասաց փոխնախարարը։