Վաշինգտոնը մտադիր է շարունակել ճնշում գործադրել Թեհրանի վրա, որպեսզի Իրանի իշխանություններին ստիպի բանակցել նոր համապարփակ համաձայնագրի շուրջ` իրանական միջուկային ծրագրի Գործողությունների համատեղ համապարփակ ծրագրի փոխարեն:
Չորեքշաբթի լրագրողների համար հերթական ճեպազրույցի ժամանակ այս մասին հայտարարել է ԱՄՆ Պետդեպարտամենտի մամուլի ծառայության ղեկավար Մորգան Օրտեգուսը, հաղորդում է ՏԱՍՍ-ը:
«Մենք կշարունակենք առավելագույն ճնշում գործադրել իրանական ռեժիմի վրա, որպեսզի զրկենք նրան կործանարար արտաքին քաղաքականություն վարելու միջոցներից եւ ստիպենք նրան բանակցել նոր համապարփակ համաձայնագրի մասին, որը կվերաբերեր նրա վարքագծի բոլոր կողմերին», - ասել է նա:
2018-ի մայիսի 8-ին Սպիտակ տան ղեկավար Դոնալդ Թրամփը հայտարարեց ԳՀՀԾ-ից Վաշինգտոնի դուրս գալու մասին, որը կնքվել է 2015-ին եւ սահամնափակում էր Թեհրանի միջուկային մշակումները ՄԱԿ ԱԽ պատժամիջոցների եւ ԱՄՆ-ի եւ ԵՄ-ի միակողմանի սահմանափակումների չեղարկման դիմաց:
2019 թվականի մայիսի 8-ին Իրանի նախագահ Հասան Ռոհանին հայտարարեց ԳՀՀԾ-ի շրջանակում ստանձնած պարտավորությունների մի մասի կատարման դադարեցման մասին:
Չորեքշաբթի «Ալ-Մայադին» հեռուստաալիքի հաղորդմամբ, Ռոհանին չի բացառել ԱՄՆ-ի հետ բանակցությունների վերսկումը, եթե Վաշինգտոնը հետեւի ԳՀՀԾ-ով սահմանված իր պարտավորություններին: Սակայն ավելի ուշ երկրի հոգեւոր առաջնորդ եւ ղեկավար Այաթոլլահ Ալի Խամենեին հայտարարել էր, որ Վաշինգտոնի հետ բանակցությունները, բացի վնասից ոչինչ չեն բերում: