Առանց դատավորների աշխատավարձների լրջորեն բարձրացման չենք կարող ունենալ դատական անկախ համակարգ: Այս մասին, այսօր՝ հունիսի 5-ին, ԱԺ-ում լրագրողների հետ զրույցում նշեց ՀՀ վարչապետ Նիկոլ Փաշինյանը:
Նա տեղեկացրեց, որ առաջիկայում կստեղծեն հակակոռուպցիոն նոր դատարան. «Օրինակ շատ են ասում՝ ինչո՞ւ մեկ տարվա ընթացքում, դատական համակարգում անհրաժեշտ բարեփոխումները չեն արվել: Ասեմ՝ ինչու չեն արվել, վերջին 1 տարվա ընթացքում մենք ունեցել ենք ասպիսի երևույթ, երբ որ դատավորի թափուր տեղի համար հայտարարված մրցույթներում եղել է այսպես կոչված «недабор»: Այսինքն դատավոր լինելու հավակնորդների թիվը ավելի քիչ է եղել, ինչո՞ւ, որովհետև մարդը ասում է, լսեք, ես գնամ 400 հազար դրամ աշխատավարձ ստանամ, մեկին ցմահ ազատազրկման դատապարտեմ, մեկին՝ 15 տարվա, մեկի գույքային հարցը լուծեմ ու ինչի՞ համար:
Հիմա ինչո՞ւ համար եմ հեռվից գալիս. առանց դատավորների աշխատավարձի լրջորեն բարձրացման չենք կարող մենք ունենալ դատական անկախ համակարգ»,-հայտարարեց Փաշինյանը:
Նա հայտարարեց, որ իրեն պետք չէ մարիոնետային դատարան. «Որովհետև ես հավատում եմ այն իդեալներին, որոնց հիման վրա մենք արել ենք փոփոխություն: Եթե ինձ պետք լիներ մարիոնետային դատական համակարգ, այդպիսի համակարգը պատրաստի դրած էր: Ես ինչի՞ եմ դատարանների դռներն արգելափակել, ցույց տալու համար դա, որ ինձ պետք չի մարիոնետային դատական համակարգ: Ինչու այսօր ՀՀ-ում դատավոր կա, որ վարչապետի ասածը կարող է չանե՞լ»,- ասաց Նիկոլ Փաշինյանը:
Վարչապետը նկատեց, որ այսօր իրենք ունեն հնարավորություն բյուջետային առումով բարձրացնել դատավորների աշխատավարձը. «Բայց եթե մենք այսօր որոշենք դատավորների աշխատավարձը բարձրացնել հանրությունը մեզ չի հասկանա: Կասեն այս սոցիալական իրավիճակում փոխանակ էս խնդիրը լուծեք, բռնում եք էտ դատավորների աշխատավարձն եք բարձրացնում, թեկուզ նոր դատավորների: Բայց եթե դատավորի աշխատավարձը բարձր չլինի, լուրջ մասնագետը չի ուզի 400 հազար դրամով գա դատավոր աշխատի՝ իմանալով, որ կաշառք չի վերցնելու: Այս ընթացքում մենք միջազգային մեր գործընկերների հետ շփումների մեջ ենք, և մենք իրենց ասում ենք՝ ժողովուրդ, մենք հիմա չենք կարող դատավորների աշխատավարձերը էականորեն բարձրացնել»,-ընդգծեց Փաշինյանը:
Դատավորների աշխատավարձի բարձրացման մոդելը, ըստ Նիկոլ Փաշինյանի, հետևյալն է՝ ստեղծվում է հակակոռուպցիոն դատարան, միջազգային դոնորներ են ներգրավվում, որոնք առաջին 3 տարիների աշխատավարձերի բեռը վերցնում են իրենց վրա:
«Եթե միջազգային հանրությունը, մեր գործընկերները մեզ աջակցեն, որպեսզի 3 տարվա կտրվածքով մենք նոր հակակոռպուցիոն դաատարանը ստեղծենք, հակակոռպուցիոն դատարանում ինչ-որ ձև գտնենք, բարձր աշխատավարձերովն նոր լուրջ մասնագետներ ներգրավենք, որոնց վստահելիությունը վեթինգով, ունեցվածքով կլինի բարձր և 3 տարի: Այդ 3 տարվա բարեփոխումների ընթացքում և դրանից հետո, որ ժողովուրդը տեսնի անկախ դատական համակարգը, օգուտ է բոլորին՝ պետությանը, ժողովրդին, տնտեսությանը և այլն: Երեք տարի հետո մենք կարող ենք ժողովրդին համոզել, որ բյուջեից պետք է գումար տրամադրել դատավորների աշխատավարձերի բարձրացման համար: Այդ 3 տարվա ընթացքում թոշակ էլ կբարձրացնենք, ամեն ինչ էլ կանենք և կասենք՝ ժողովուրդ, հիմա դատավորները պետք է ստանան ամսական, օրինակ՝ 2.5-3 մլն դրամ աշխատավարձ»,- նշեց Նիկոլ Փաշինյանը:
Վարչապետը հայտնեց, որ այս մոդելը քննարկվել է միջազգային գործընկերների հետ, նրանք ի գիտություն են ընդունել այն, բայց աշխատանքը պետք է շարունակվի, որպեսզի ֆինանսական աջակցություն տրամադրվի Հայաստանին:
