Երեւանում անցկացվում է «Վեթինգի եւ անցումային արդարադատության մասնագիտական քննարկում» թեմայով կլոր սեղան:
Միջոցառումը բացելով՝ արդարադատության նախկին նախարար Դավիթ Հարությունյանը նշեց, որ այսօրվա միջոցառման մասնակիցները պատրաստ են եղել մասնակցել խորհրդարանական լսումներին, սակայն դրանից առաջ վարչապետը մամուլի ասուլիսին հարցի վերաբերյալ վերջնական կարծիք է հայտնել, ինչը նշանակում էր, որ ԱԺ լսումները կլինեն քաղաքական, այլ ոչ թե փորձագիտական բնույթի:
Այդ կապակցությամբ որոշվել է անցկացնել առանձին կլոր սեղան եւ արդյունքները ներկայացնել նախագծի մշակողներին: «Մենք, մեր հերթին, զերծ կմնանք քաղաքական գնահատականներից», - ասաց Հարությունյանը:
Առաջին զեկուցող, «Իրավական ճանապարհ» հկ համահիմնադիր Սիրանուշ Սահակյանը ներկայացրեց երկրում գոյություն ունեցող իրավական հիմքերը անցումային արդարադատության ներդնման համար:
Պարզվեց աշխարհում ընտրություններից հետո ԱԱ ներդնման ընդամենը երկու օրինակ կա՝ Քենիայում եւ Փղոսկրե ափում, ընդ որում երկու դեպքում էլ զանգվածային սպանություններ եւ քաղաքացիական պատերազմ է տեղի ունեցել:
Այսինքն գործիքը կիրառվում է հանցագործության մասշտաբայնության դեպքերում, ընդ որում մասշտաբայնությունը գնահատվում է ոչ միայն երկրի ներսում, այլեւ ՄԱԿ կողմից մի շարք դեպքերում: Հայաստանից այդ կառույցին դիմելու երկու դեպք է հայտնի՝ 2008 թվականի մարտի 1-ից եւ 2016-ի ապրիլյան պատերազմից հետո:
