Ազատության հրապարակում ժամը 20-ի սահմաններում սկսվեց ընդդիմության ինքնաբուխ հանրահավաքը (ֆոտոռեպորտաժ): Այն սկսվեց այն բանից հետո, երբ կարգավորվեց էլեկտրաէներգիայի մատակարարման հարցը եւ հրապարակ բերվեց համապատասխան տեխնիկան:
Հավաքվածներին դիմեց Արամ Մանուկյանը, ով ասաց, որ ավարտվում է մթության եռամյա փուլը, եւ այսօր ձեռք է բերվել միայն առաջին նշանակալից հաղթանակը: Ընդդիմադիր գործիչը նշեց, որ ՀԱԿ-ի բոլոր համակիրները պետք է ենթարկվեն քաղաքական ուժի հրահանգներին: «Ես գիտեմ, որ շատերը ծարավ են վրեժ լուծել կատարված հանցագործությունների համար, սակայն այդ ամենը պետք է մի կողմ դնել: Բոլոր մեղավորները պետք է պատժվեն օրենքով»,- ասաց նա:
ՀԱԿ-ի համակարգող Լեւոն Զուրաբյանն իր հերթին նշեց, որ ՀԱԿ-ը գնում է «թավշյա հեղափոխության» ճանապարհով, որպիսիք եղել են Արեւելյան Եվրոպայի երկրներում 1980-ականների վերջին:
