Իրանի նախագահ Հասան Ռոհանին զգուշացրել է միջուկային համաձայնագրի տապալման մասին՝ եվրոպական երկրներին կոչ անելով գործարքը պահպանելու համար իրականացնել իրենց պարտավորությունները, հաղորդում է Mehr-ը:
Իրանում Ֆրանսիայի նոր դեսպան Ֆիլիպ Տիբոյի հետ հանդիպման ժամանակ Ռոհանին նշել է, որ ներկայիս վիճակը ճգնաժամային է, եւ Ֆրանսիան ու համաձայնագրի մյուս մասնակիցները սահմանափակ հնարավորություն ունեն՝ իրենց պատմական դերը խաղալու գործարքի պահպանման գործում:
«Կասկած չկա, որ համաձայնագրի կործանումը վնաս կբերի Իրանին, Ֆրանսիային, տարածաշրջանին եւ ողջ աշխարհին»,- նշել է Ռոհանին:
Նրա խոսքով՝ դեղորայքի եւ բժշկական սարքավորումների ներմուծման հարցերը, օդանավերի համար պահեստամասերը, սննդի առեւտուրը դուրս են համաձայնագրի շրջանակներից եւ նույնիսկ երկկողմ հարաբերություններից:
«Իրանը վճռական է զարգացնել հարաբերությունները Ֆրանսիայի հետ բոլոր ոլորտներում, որոնք փոխադարձ հետաքրքրություն են ներկայացնում, հատկապես՝ տնտեսական ոլորտում: Մենք չպետք է թույլ տանք, որպեսզի ինչ-որ գործոն խոչընդոտի Թեհրան-Փարիզ հարաբերությունների զարգացմանը»,- ընդգծել է Ռոհանին:
Ֆրանսիացի դիվանագետն իր հերթին նշել է, որ Ֆրանսիայի կառավարությունը բոլոր ջանքերը կներդնի Թեհրանի հետ տնտեսական համագործակցությունը խորացնելու համար: Նրա խոսքով՝ Թեհրանն իրականացնում է համաձայանգրի իր պարտավորությունները, եւ Ֆրանսիան փորձում է պաշտպանել այդ համաձայնագիրը:
Նշելով, որ Ֆրանսիան մտահոգված է տարածաշրջանի լարվածությամբ, ֆրանսիացի դեսպանն ասել է.
«Փարիզը մտադիր է Իրանի հետ քննարկել տարածաշրջանային անվանգությունն ու կայունությունը»:
