Իրանի Մեշհեդ քաղաքում ակտիվիստները հարձակվել են Սաուդյան Արաբիայի հյուպատոսության վրա։ Ցուցարարները բողոքում են Բահրեյն զինուժ ուղարկելու դեմ։ Նրանք կոտրել են հյուպատոսության ապակիները, հայտնում է FARS գործակալությունը։

Հանրահավաքի մասնակիցները պահանջել են փակել երկրում Սաուդյան Արաբիայի հյուպատոսությունը եւ դեսպանին վտարել երկրից։

Բահրեյնում օրերս եռամսյա ժամկետով արտակարգ իրավիճակ էր մտցվել։ Սրանից մեկ օր առաջ Սաուդյան Արաբիայից այդ երկիր էին ժամանել հազար զինվորականներ։

Իրանի իշխանությունները սուր քննադատության էին ենթարկել օտարերկրյա զորքերի մուտքն այդ երկիր։ Բահրեյնն այս կապակցությամբ Թեհրանից հետ էր կանչել իր դեսպանին։

Բահրեյնի մայրաքաղաքի Մարգարտե հրապարակում ցույցերը շարունակվում են փետրվար 14-ից։