Հայաստանում ֆրանկոֆոնիայի օրերի շրջանակում միջոցառումներ են անցկացվում ոչ միայն Երեւանում, այլեւ Հայաստանի մարզերում: Այսօր՝ մարտի 19-ին Գյումրիում տրվել է ֆրանկաֆոնիայի օրերի մեկնարկը: Քաղաքի տարբեր ուսումնական հաստատությունների ներկայացուցիչներ, աշակերտներ ու պաշտոնյաներ Գյումրիի Անկախության հրապարակից երթով անցել են քաղաքի կենտրոնական փողոցներով, իսկ քաղաքի կենտրանական հրապարակում մասնակցել տոնական միջոցառմանը, որին ներկա են գտնվել նաեւ ֆրանկոֆոն մի շարք երկրներից ներկայացուցիչներ:
Շիրակի մարզի Աղին գյուղի դպրոցի տնօրենի խոսքով, ֆրանսերենի ուսուցումն իրենց դպրոցում սկսել են ընդամենը 5 տարի առաջ, քանի որ մինչ այդ մասնագետի պակաս կար: Իսկ դպրոցի ուսուցիչ Արտաշես Հակոբյանն ասում է, թե առարկայի դասաժամերը դպրոցներում վերանայելու անհրաժեշտություն կա, քանի որ, թեեւ մեր երկրում ֆրանսերենը օտար լեզուների շարքում 3-րդն է, բայց ֆրանսերենի իմացության մակարդակը բավականին ցածր է:
Միջոցառմանը մասնակցել են նաեւ ներկայացուցիչներ ֆրանկոֆոն երկրներից: Հայաստանում Ֆրանսիայի դեսպան Անրի Ռենոն ողջունել է ներկաներին ու շեշտել, որ Հայաստանում կա Ֆրանկոֆոն երկու քաղաք՝ Գյումրին եւ Երեւանը: Նշել է նաեւ, որ զարմացած է հատկապես գյումրեցիների հյուրասիրությունից:
Հիշեցնենք, որ Հայաստանը Ֆրանկոֆոնիայի միջազգային կազմակերպության անդամ է դարձել 2008 թվականին: Իսկ Գյումրիում Ֆրանկոֆոնիայի օրերին նվիրված միջոցառում առաջին անգամ է անցկացվում, այն միջոցառման կազմակերպիչների խոսքերով կտեւի մեկ շաբաթ:
