Իրանի եւ ԱՄՆ նախագահներ Հասան Ռոհանիի եւ Դոնալդ Թրամփի հանդիպումն անհնար է, քանի դեռ Վաշինգտոնը չի վերադարձել միջուկային գործարքի դրույթների կատարմանը։ Այս մասին երեքշաբթի ասել է Իրանի ԱԳՆ ղեկավար Մոհամադ Ջավադ Զարիֆը, տեղեկացնում է ՏԱՍՍ-ը։
«Բիարից ուղեւորության ժամանակ ես ասացի, որ Իրանի նախագահի եւ Թրամփի հանդիպումն անհնար է, քանի դեռ ԱՄՆ-ը չի վերադառնա «5+1» ձեւաչափին (ՄԱԿ ԱԽ հինգ մշտական անդամներ + Գերմանիա) եւ չի սկսի կատարել միջուկային գործարքի (դրույթները)»,- Զարիֆին մեջբերում է IRIB հեռուստառադիոկորպորացիան։ Նա ավելացրել է, որ«քանի դեռ դա տեղի չի ունեցել, երկկողմ բանակցություններ չեն կայանա»։
Նախարարի խոսքով՝ «այն, ինչ ասել են ԱՄՆ եւ Ֆրանսիայի ներկայացուցիչները, միայն նրանց գործն է մնում»։ «Մեր դիրքորոշումը հստակ է. ԱՄՆ-ը եւ Թրամփը քանդել են պայմանագիրը, որը դարձել է երկրների միջեւ երկարատեւ բանակցությունների արդյունքը, դրա համար էլ այժմ անհրաժեշտ է կատարել նախկին պայմանավորվածությունները։ Այս ուղղությամբ մենք ԱՄՆ-ի կողմից ընդունելի գործողություններ չենք տեսնում»,- ընդգծել է Զարիֆը։
Երկուշաբթի Ֆրանսիայի նախագահ Էմանուել Մակրոնն ասել էր, որ անհրաժեշտ է համարում, որ Թրամփն ու Ռոհանին հանդիպեն։ Ֆրանսիայի նախագահի կարծիքով՝ այդ քայլը «կօգներ կանգնեցնել իրավիճակի թեժացումը եւ հասնել նպատակներին»։ ԱՄՆ նախագահն ի պատասխան ասել է, որ պատրաստ է հանդիպել Ռոհանիի հետ պատշաճ պայմանների առկայության դեպքում։
Իրանի միջուկային փաթեթի խնդիրը կտրուկ սրվել է Գործողությունների համատեղ համապարփակ ծրագրից 2018-ի մայիսի 8-ին ԱՄՆ միակողմանի դուրս գալուց եւ Իրանի դեմ ամերիկյան տնտեսական պատժամիջոցներ մտցնելուց հետո նավթի արտահանման ոլորտում։ Թրամփը քանիցս հայտարարել է, որ պատրաստ է երկխոսության Թեհրանի հետ։ Միեւնույն ժամանակ, նա ասել է, որ շահագրգռված է փոխարինել ԳՀՀԾ-ն այլ պայմանագրով, որը կներառեր ոչ միայն Իրանի ատոմային ծրագիրը, այլեւ հարցերի լայն շրջանակ, ներառյալ Թեհրանի հրթիռային ծրագիրը եւ նրա տարածաշրջանային քաղաքականությունը։
