Վրաստանի հայկական դպրոցներում հայերենի դասավանդման ժամերն ավելանալու են: Նման համաձայնություն է ձեռք բերվել Հայաստանի կրթության եւ գիտության նախարար Արմեն Աշոտյանի եւ նրա վրացի գործընկեր Դմիտրի Շաշկինի միջեւ` մարտի 23-27-ը Հայաստանի նախարարի Թբիլիսի կատարած այցի ընթացքում:
Հայաստանի ԿԳՆ մամուլի ծառայությունից NEWS.am-ին հայտնում են, որ հայկական դպրոցներում հայերենի դասաժամերն ավելացվելու են եւ դրանց քանակը հավասարեցվելու են վրացերենի դասաժամերին, ինչպես նաեւ Հայաստանի մասնագետները այսուհետ կմասնակցեն դասագրքերի` վրացերենից հայերեն թարգմանության աշխատանքներին:
Կշարունակվի նաեւ «Հայոց լեզու» առարկայի ուսուցիչների վերապատրաստման աշխատանքները:
Հայաստանի եւ Վրաստանի կրթության եւ գիտության նախարարները ստորագրել են հուշագիր` 2 երկրների ուսանողների համար բուհերում 10 կրթաթոշակներ հատկացնելու վերաբերյալ: Նախարար ԱԱշոտյանն այցելել է նաեւ Թբիլիսիի Ջավախիշվիլու անվան պետական համալսարան եւ հանդիպում ունեցել հայագիտության ֆակուլտետի ուսանողների հետ, ինչպես նաեւ Թբիլիսիի N 104 հայկական դպրոցում հանդիպել է ուսուցիչների եւ աշակերտների հետ: