Բրիտանիայի վարչապետ Բորիս Ջոնսոնը մտադիր չէ հրաժարական տալ, ասել է նրա ավագ նախարարներից մեկը՝ հերքելով ԶԼՄ-ների ենթադրությունները, թե նա կարող է անել դա, որպեսզի ընտրություններ նախաձեռնի։
«Ես չեմ կարծում, թե վարչապետը մտադիր է հրաժարական տալ։ Նա ընտրվել է ղեկավարության ընտրություններում, որոնց ես մասնակցել եմ։ Նա հաղթել է այդ ընտրություններում»,- ասել է նախարարը, տեղեկացնում է Reuters-ը։
Բրիտանական խորհրդարանի Համայնքների պալատը մեկ օրում՝ սեպտեմբերի 4-ին, եվրաթերահավատ վարչապետ Բորիս Ջոնսոնին երկու ծանր հարված է հասցրել. ընդունել է օրենք, որն արգելում է «կոշտ բրեքսիթը», եւ հրաժարվել անցկացնել արտահերթ ընտրություններ Ջոնսոնին հարմար ժամանակ, տեղեկացնում է BBC-ն։ https://www.bbc.com
Օրվա ընթացքում Համայնքների պալատի մեծամասնությունը, որը բաղկացած է բոլոր ընդդիմադիր կուսակցությունների պատգամավորներից եւ եվրոպամետ տրամադրված ընդդիմախոսների մեծ խմբից Ջոնսոնի սեփական՝ Պահպանողական կուսակցության ներսում, կատաղի տեմպով, բոլոր երեք ընթերցումներում մի քանի ժամում ընդունեց օրենք, որն ուղղակի վարչապետին պարտավորեցնում է հոկտեմբերին խնդրել Եվրամիությանը ԵՄ-ից Բրիտանիայի դուրս գալու նոր հետաձգման մասին, մինչեւ 2020 թվականի հունվարի 31-ը։
Այժմ ԵՄ-ից Բրիտանիայի դուրս գալը նշանակված է հոկտեմբերի 31-ին։
Այս օրենքի օգտին երրորդ ընթերցմամբ քվեարկել է 327 պատգամավոր, դեմ՝ 299-ը։ Այնուհետեւ այն պետք է հաստատվի Լորդերի պալատում։
Այն բանից անմիջապես հետո, երբ Համայնքների պալատը քվեարկեց իր օրինագծի օգտին, Բորիս Ջոնսոնը, ինչպես եւ խոստացել էր ավելի վաղ, պաշտոնապես առաջարկեց անմիջապես անցկացնել արտահերթ ընտրություններ։ Միեւնույն ժամանակ, վարչապետը կցանկանար ընտրություններն անցկացնել հոկտեմբերի 15-ին, ԵՄ գագաթաժողովից երկու օր առաջ, որտեղ կլուծվի «բրեքսիթի» հարցը։
«Թող երկիրը որոշի ով՝ ընդդիմության առաջնո՞րդը, թե՞ ես հոկտեմբերին Բրյուսելում կլուծի այս հարցը»,- ասել է Ջոնսոնը, որը մի քանի անգամ վերջին երեք օրում հայտարարել է, թե ինքը ոչ մի պայմանով հետաձգում չի խնդրի ԵՄ-ից։
Բայց ընդդիմությունը, որն այժմ վստահաբար վերահսկում է դրությունը, մերժել է Ջոնսոնին։
