Հանդիպումներ անցկացվում են այն ժամանակ, երբ անհրաժեշտություն է առաջանում: Այս մասին սեպտեմբերի 25-ին լրագրողների հետ զրույցում ասել է Հայաստանում ԱՄՆ արտակարգ եւ լիազոր դեսպան Լինն Թրեյսին՝ անդրադառնալով ՀՀ վարչապետ Նիկոլ Փաշինյանի եւ ԱՄՆ նախագահ Դոնալդ Թրամփի հնարավոր հանդիպման հարցին:
Նրա խոսքով՝ հանդիպումներ անցկացվում են ամենատարբեր մակարդակներով, արդյունավետ համագործակցություն է իրականացվում, եւ համագործակցության արժեքը որոշվում է ոչ թե բարձր մակարդակի հանդիպումներով, այլ երկկողմ հարաբերությունների բովանդակությամբ: Դեսպանը հիշեցրել է այս տարվա ապրիլին կոնգրեսականների պատվիրակության այցի մասին, որի ընթացքում Երեւանում ռազմավարական երկխոսություն է կայացել եւ որին մասնակցել են ամերիկացի պաշտոնատար անձինք: Նա նաեւ հիշեցրել է սեպտեմբերին ԱՄՆ պաշտպանության նախարարության պատվիրակության հայաստանյան այցի մասին:
Անդրադառնալով Նիկոլ Փաշինյանի ԱՄՆ այցին՝ Լինն Թրեյսին նշել է, որ դեսպանատունն ուշադիր հետեւում է այդ իրադարձությանը: Նրա խոսքով՝ Փաշինյանն արդյունավետ հանդիպումներ է ունեցել Կալիֆոռնիայի նահանգապետի եւ փոխնահանգապետի հետ:
«Համագործակցության մասին շրջանակային համաձայնագիր է ստորագրվել, եւ կարծում եմ, որ դա Կալիֆոռնիայի եւ Հայաստանի համագործակցության զարգացման ուղղությամբ արդյունավետ մոտեցում է: Գաղտնիք չէ, որ ԱՄՆ-ում հայկական ամենամեծ սփյուռքը հենց այդտեղ է գտնվում: Բացի այդ, Կալիֆոռնիան որպես առանձին նահանգ զբաղեցնում է աշխարհում տնտեսական ուժի առումով 5-րդ տեղը»,- եզրափակել է դեսպանը:
Հիշեցնենք, որ Նիկոլ Փաշինյանն աշխատանքային այցով ԱՄՆ է մեկնել սեպտեմբերի 21-ին: Սեպտեմբերի 22-ին նա մասնակցել է Լոս Անջելեսի «Գրանդ պարկում» կազմակերպված հանրահավաքին, որտեղ հանդես է եկել ելույթով: Փաշինյանը հանդիպել է նաեւ Կալիֆոռնիայի եւ Լոս Անջելեսի ղեկավարության հետ: