Հայաստանում փախստականներն այն զանգվածն են, որոնց հաշվին պորտաբուծությամբ են զբաղված չինովնիկները։ NEWS.am-ի թղթակցի հետ զրույցում այս մասին հայտարարեց ԼՂՀ նախկին արտգործնախարար Արման Մելիքյանը։
Նրա խոսքով, խոսքը գնում է ոչ միայն հայրենական չինովնիկների, այլ նաեւ միջազգային տարբեր կառույցների ներկայացուցիչների, այդ թվում՝ ՄԱԿ-ի ներկայացուցչության մասին։
Որպես օրինակ՝ նա բերեց նախկինում բանտի շենքում ապրող, Քասախ գյուղում փախստական 50 ընտանիքների համար կառուցվող բնակելի շենքի շինարարության հարցը։ Նրանք մեծ դժվարությամբ կարողացան հասնել իրենց նպատակին։ Ճապոնիայի կառավարության կողմից տրամադրվել էր 760 հազար դոլար։ Արդյունքում անցած տարվա հունիսին շահագործման հանձնվեց նախատեսված երկու շինություններից մեկը։ Պատճառաբանությունն այն էր, որ շինարարության ընթացքում գները բարձրացել են։ «Տարվա վերջին շենքի պատերին ճաքեր հայտնվեցին։ Փախստականերին այդպես էլ այնտեղ չտեղավորեցին չնայած, որ շինությունը մեծ հանդիսավորությամբ բացեցին։ Այնտեղ էր նաեւ ՄԱԿ-ի երեւանյան գրասենյակի ներկայացուցիչ Բուշրա Ալեփոթը, տարածքային կառավարման նախարար Արմեն Գեւորգյանը, Միգրացիոն պետական ծառայության ղեկավար Գագիկ Եգանյանը։ Նրանք բոլորը ծափահարում էին։ Փախստականներին բացման արարողությանը չէին հրավիրել»,- նկատեց Մելիքյանը։
Նրա խոսքով, չինովնիկները դրանից հետո ճապոնական միջոցները ոչ ճիշտ տնօրինելու պատասխանատվությունը միմյանց վրա էին գցում։
Մելիքյանի խոսքով, փախստականների հետ վատ վերաբերմունքի այլ օրինակներ էլ կան։ «Նրանց ստիպում են հակառակ սեփական կամքի Հայաստանի քաղաքացիություն ընդունել, այնպիսի իրավիճակի մեջ են դնում, որ նրանք չեն կարողանում հրաժարվել»։