Սերբիայի Հանրապետություն կատարած պաշտոնական այցի շրջանակում Հայաստանի Հանրապետության նախագահ Արմեն Սարգսյանը տիկնոջ՝ Նունե Սարգսյանի հետ այսօր հյուրընկալվել է Սերբիայի գիտությունների եւ արվեստի ակադեմիայում։

Ակադեմիայի նախագահ Վլադիմիր Կոստիչի ուղեկցությամբ նախագահ Սարգսյանը եւ տիկին Նունե Սարգսյանը շրջել են գիտական հաստատությունում, այնուհետեւ հանդիպել ղեկավար կազմի հետ։ Վլադիմիր Կոստիչը ներկայացրել է ակադեմիայի կառուցվածքն ու գործունեության ուղղությունները։

Նախագահ Սարգսյանը հետաքրքրվել է Սերբիայի գիտությունների եւ արվեստի ակադեմիայի գիտահետազոտական գործունեությամբ, ինչպես նաեւ համագործակցության հնարավորություններով։

Նախագահին տեղեկացվել է, որ 1841 թվականին հիմնված ակադեմիան ներկայումս ունի ութ գիտական հաստատություն, գիտահետազոտական կենտրոններ, ինչպես նաեւ մասնաճյուղ՝ Նովի Սադ քաղաքում։ Ակադեմիան ունի հարուստ արխիվ եւ մեծ գրադարան, որտեղ պահվում է գիտության ու արվեստի տարբեր բնագավառներին վերաբերող ավելի քան 1.5 մլն անուն գիրք: