Քննչական կոմիտեի նախագահ Հայկ Գրիգորյանը շնորհավորել է Քննչական կոմիտեի ծառայողներին՝ մասնագիտական տոնի կապակցությամբ:
Շնորհավորանքում, մասնավորապես, ասվում է.
«Հարգելի՛ գործընկերներ
Շնորհավորում եմ Ձեզ Քննչական կոմիտեի ծառայողի օրվա կապակցությամբ:
Քննչական մարմինները մինչդատական վարույթի շարժիչ ուժն են, իսկ Քննչական կոմիտեի դերակատարումն այստեղ առաջնայիններից մեկն է: Վստահ եմ, որ այդպես է լինելու նաեւ վաղը, պետական մարմինների փոփոխված հարաբերակցության պայմաններում: Ձեր գործունեությունից ապագայում ակնկալիքներն այսօրվանից պակաս չեն լինելու:
Քննչական կոմիտեի բոլոր ծառայողների մասնագիտական բարձր պատրաստվածության, քաղաքացիական հստակ դիրքորոշման եւ ամենօրյա տքնաջան աշխատանքի շնորհիվ նկատելիորեն ակտիվացել է կոռուպցիայի եւ, առհասարակ, հանցագործությունների դեմ մղվող անողոք պայքարը, ամրապնդվել համագործակցությունն ինչպես իրավապահ եւ ուժային այլ կառույցների, այնպես էլ` քաղաքացիական հասարակության ինստիտուտների հետ, ինչը հանցավոր ոտնձգություններից մեր հասարակության պաշտպանության հուսալի նախադրյալներից է:
Այդուհանդերձ, մեր անելիքները դեռ շատ են, եւ ձեզանից յուրաքանչյուրն իր ամենօրյա ծառայողական պարտականությունները պետք է կատարի` մերժելով հանրության համար ոչ ընկալելի դրսեւորումները, հիմնվելով համակարգի լավագույն ավանդույթների վրա, դրսեւորելով կամք եւ տոկունություն` ապօրինությունների հանդեպ աննախադեպ մերժելի վերաբերմունք որդեգրած մեր համաքաղաքացիների սպասումներն արդարացնելու հարցում:
Մենք հպարտանալու ենք այն քննիչներով, ովքեր համարժեք են ընկալում այս իրողությունները, որոնց համար պետությանը եւ օրենքին անմնացորդ ծառայելը, գործին նվիրվածությունը եւ պետական մտածողությունը սոսկ խոսքեր չեն, այլ` ամենօրյա աշխատանքի ուղենիշներ:
Վստահ եմ, որ սկզբունքայնությամբ, աշխատասիրությամբ, կուտակված փորձով, մասնագիտական բարձր գիտելիքներով եւ աշխատանքի կազմակերպման նոր մոտեցումներով կարողանալու եք պատվով կատարել ծառայությանը օրենսդրությամբ վերապահված բարդ ու դժվարին գործառույթները:
Մեկ անգամ եւս շնորհավորում եմ Ձեզ Քննչական կոմիտեի ծառայողի օրվա կապակցությամբ, իսկ Ձեր ընտանիքներին մաղթում խաղաղություն, սեր եւ համերաշխություն»:
