Հայաստանում բլոկչեյն տեխնոլոգիաների խթանման 3 տարրերն են ֆինանսական ներարկումները, օրենսդրությունն ու կրթությունը: Այս մասին այսօր լրագրողների հետ զրույցում ասաց Հոնկոնգի FinTech Association-ի նախագահ Հենրի Ասլանյանը, որը Հայաստան է ժամանել՝ մասնակցելու բլոկչեյնի միջազգային համաժողովին:
Նրա խոսքով՝ այժմ ողջ աշխարհում բլոկչեյն տեխնոլոգիաներին հատուկ նշանակություն է տրվում, ամենուր դրա խթանման հանդեպ հետաքրքրություն է դրսեւորվում: Հայաստանը՝ լինելով բազմաթիվ ստարտափեր եւ տեխնոլոգիական ընկերություններ ունեցող երկիր, եւս հետաքրքրություն է դրսեւորում այդ տեխնոլոգիաների հանդեպ, քանի որ բլոկչեյնն ու կրիպտոարժույթի ոլորտը կարող են չափազանց օգտակար լինել միջազգային շուկայում այդ տեխնոլոգիաների խթանման համար:
Ասլանյանը նշեց, որ բլոկչեյնը նոր ուղղություն է, եւ կարեւոր է, որ այդ ոլորտում Հայաստանն ունի իր ստարտափերը:
«Հայաստանում բլոկչեյն համայնքը դեռ փոքր, սակայն միջազգային հարթակում ոլորտի շատ առաջնորդներ ազգությամբ հայ են»,- հայտարարեց նա:
Խոսելով երկրում բլոկչեյն տեխնոլոգիաների խթանման եւ զարգացման մասին՝ նա նշեց ֆինանսական ներարկումների անհրաժեշտության, ինչպես նաեւ օրենսդրական կարգավորման մասին: Այդ երկու բաղադրիչները, նրա խոսքով, կարող են նպաստել բլոկչեյն տեխնոլոգիաների ոլորտում աշխատող ընկերությունների զգալի աճին: «Սակայն Հայաստանում բլոկչեյն տեխնոլոգիաների զարգացման հիմք է կրթությունը: Երբ համալսարաններում ուսանողներին բլոկչեյն տեխնոլոգիաների վերաբերյալ ուսումնական նյութեր ներկայացնեն, աճը կապահովվի»,- հավելեց Հենրի Ասլանյանը: