Դեմոկրատական կուսակցությունից ԱՄՆ նախագահի թեկնածու Թուլսի Հաբբարդն ԱՄՆ Սենատին եւ նախագահ Դոնալդ Թրամփին կոչ է արել պաշտոնապես ճանաչել Հայոց ցեղասպանությունը: Այս մասին Twitter-ում հայտնել է Ամերիկայի հայ ազգային կոմիտեն:
«ԱՄՆ-ի պատմությունը միահյուսվել է հայ ժողովրդի եւ Հայոց ցեղասպանության պատմության հետ, երբ ամերիկացի միսիոներներն ու դիվանագետներն աշխարհին հասկացնել են տվել, որ Օսմանյան կայսրությունը փորձում է զտել հայ եւ քրիստոնեական բնակչությանը: ԱՄՆ-ը շատ վերապրածների համար տուն է դարձել»,- ասել է ԱՄՆ նախագահի թեկնածուն:
«Ես եղել եմ եւ՛ Հայաստանում, եւ՛ Լեռնային Ղարաբաղում: Ես տեսել եմ Ցեղասպանությունը ժխտող Թուրքիան, որը չի վախենում այն կրկնել: Թուրքիան փաստացի Սիրիայի հյուսիսում սիրիացի քրդերի էթնիկ զտում է սկսել»,- հավելել է նա:
Հաբբարդն ԱՄՆ Սենատին եւ նախագահ Դոնալդ Թրամփին կոչ է արել պաշտոնապես ճանաչել Հայոց ցեղասպանությունը՝ հետեւելով ԱՄՆ Ներկայացուցիչների պալատի օրինակին:
«Մենք չենք կարող թույլ տալ, որպեսզի պատմությունը կրկնվի»,- եզրափակել է նա:
