Անցանկալի է գործնականում ՀԱՊԿ արդյունավետության ստուգումը, քանի որ դա հղի է շատ մեծ ռիսկերով մեր բոլոր երկրների համար՝ անկախ նրանից, թե ուղղակիորեն կամ անուղղակիորեն են դրանք ներգրավված կոնֆլիկտին:

Այս մասին նոյեմբերի 4-ին «ՀԱՊԿ-ի դերը տարածաշրջանային անվտանգության ապահովման գործում» թեմայով կլոր սեղանի ժամանակ հայտարարեց Հայաստանում Ղազախստանի արտակարգ եւ լիազոր դեսպան Թիմուր Ուրազաեւը:

Նրա խոսքով՝ ՀԱՊԿ անդամները պետք է հստակեցնեն՝ այս կամ այն հարցով որոշակի լուծումներ որքանով են համապատասխանում կազմակերպության կանոնադրային հարաբերություններին:

«Մեր զինված ուժերի պատրաստվածության համար ես հանգիստ եմ, սակայն հարցերը պետք է լուծել քաղաքական մակարդակով առանց ռազմական ուժի կիրառման, եւ ՀԱՊԿ ԽՎ-ն այն հարթակն է, որը թույլ է տալիս մշակել համատեղ մոտեցումները, ինչը շատ կարեւոր է՝ հաշվի առնելով տարածաշրջանում սպառնալիքների աճը»,- նշեց նա:  

Հիշեցնենք, որ նոյեմբերի 5-ին Երեւանում տեղի կունենա Հավաքական անվտանգության պայմանագրի կազմակերպության Խորհրդարանական վեհաժողովի (ՀԱՊԿ ԽՎ) հերթական լիագումար նիստը։