Իրանում վերջին անկարգությունների հիմնական մեղավորներն ու իրավախախտները կալանավորված են։ Այս մասին ասել է «Բասիջ» ուժերի հրամանատար, բրիգադի գեներալ Գոլառեզա Սուլեյմանին, տեղեկացնում է Mehr-ը։
Նրա խոսքով՝ վերջին շրջանի անկարգությունները կարելի է բաժանել երկու մասի՝ պարզ բողոքներ բենզինի գնի բարձրացման դեմ եւ թշնամիների չարաշահումներ ցուցարարների հանդեպ։
«Մարդիկ իրենց խաղաղ ցույցերն սկսեցին շաբաթ առավոտյան, բայց նույն օրվա երեկոյան անկարգությունների ալիքը հրահրվեց երկրի թշնամիների կողմից»,- ասել է Սուլեյմանին։ «Կիրակի իրավիճակը կայունացավ ողջ երկրում, եւ այսօր իրավիճակը բարելավվել է»,- ասել է նա՝ ավելացնելով, որ իրավախախտների մեծ մասը հայտնաբերվել է»։
Անցած հինգշաբթի Իրանի նավթամթերքների բաշխման ազգային ընկերությունը (NIOPDC) հայտարարել էր, որ մեկ լիտր սովորական բենզինի գինը բարձրացել է մինչեւ 15 հազար ռիալ (12,7 սենթ) 10 հազարի փոխարեն, իսկ յուրաքանչյուր մասնավոր մեքենայի համար սահմանվել է սահմանաչափ՝ ամիսը 60 լիտր։ Լրացուցիչ գնումները կարժենան մեկ լիտրը 30 հազար ռիալ։
Դրանից հետո երկրում սկսվել է բողոքի ակցիաների ալիք, որոնք վերաճել են անկարգությունների։ Պաշտոնական տվյալներով՝ կալանավորվել է մոտ 1000 մարդ։