Նոյեմբերի 15-ին, ժամը 01.20-ին, ոստիկանություն էր զանգահարել մի ՍՊԸ տնօրեն եւ հայտնել, թե իրենց մեքենայով օդանավակայանից ուղեւորի են դիմավորել, բայց «Մերսեդեսը» Իսակովի պողոտայում փախցրել են:
Ոստիկանությունից NEWS.am-ին հայտնում են, որ ոստիկանության Մալաթիայի բաժնից մեկնած օպերատիվ խումբը պարզել էր, որ ժամը 23.20-ին մի կին հաճախորդ պատվիրել է ընկերությանը պատկանող «Մերսեդեսը»՝ «Զվարթնոց» օդանավակայանից դեպի Թոխմախ ուղեւորվելու նպատակով:
Տեղ հասած մեքենան նստել էին հաճախորդ կինն ու մի անծանոթ տղամարդ: Իսկ Բագրատունյաց փողոցի բենզալցակայանում, երբ վարորդը ջուր գնելու համար դուրս էր եկել մեքենայից, անծանոթ տղամարդը փախցրել էր «Մերսեդեսը»:
Ժամը 02.40-ին մեքենան վթարված վիճակում հայտնաբերվել էր Արշակունյաց պողոտայի եւ Շիրակի փողոցի խաչմերուկում:
Նախապատրաստված նյութերը տարածքային ենթակայության կարգով ուղարկվել էին ոստիկանության Շենգավիթի բաժին:
Շենգավիթի քրեական հետախույզների ձեռնարկած միջոցառումների շնորհիվ պարզվել է, որ մեքենան փախցրել է Տիգրան Մեծի պողոտայի բնակիչ, 30-ամյա մի տղամարդ: Բացատրական աշխատանքի արդյունքում նա ներկայացել է բաժին, տվել խոստովանական բացատրություն եւ հավելել, որ խաչմերուկում վթարի են ենթարկվել ու թողնելով մեքենան՝ հեռացել: Ճշտվել է նաեւ մեքենան պատվիրած հաճախորդ կնոջ ինքնությունը:
Նախապատրաստվում են նյութեր:
