ԵՄ-ը ողջունում է Հայաստանի եւ Եվրամիության միջեւ «Համապարփակ եւ ընդլայնված գործընկերության համաձայնագրի» (ՀԸԳՀ/CEPA) իրականացման եւ վերաձեւավորման հարցում Հայաստանի հակվածությունը: Այս մասին հայտարարել է արտաքին կապերի եվրոպական ծառայությունում Կենտրոնական Ասիայի, Եվրոպայի հարցերով տնօրենի տեղակալ Լյուկ Դեւինը:
Ելույթ ունենալով ՀԸԳՀ ստորագրման 2-ամյակին նվիրված մամուլի ասուլիսում՝ Դեւինը նշել է, որ հանդիպել է փոխվարչապետ Մհեր Գրիգորյանի հետ, որպեսզի քննարկի համաձայնագրի իրականացման ուղղությամբ քայլերը, որոնք ձեռնարկում է Հայաստանը:
Նա նշել է, որ «Արեւելյան գործընկերությունը» նշում է իր տասնամյակը, եւ ԵՄ-ում ուրախ են, որ կարող են Հայաստանի հետ կիրառել դիֆերենցիացիայի սկզբունքը:
Նրա խոսքով՝ ԵՄ դիրքորոշման ապացույց է GSP + մեխանիզմի պահպանումը:
ԵՄ ներկայացուցիչը հավելել է, որ ՀԸԳՀ-ը ներդնում է եվրոպական ստանդարտներ առեւտրի, ներդրումների ոլորտներում, բիզնեսի հնարավորությունների, նոր աշխատատեղերի եւ էկոլոգիական հարցերի համար:
«Ուրախ ենք, որ քաղաքացիական հանրությունն իր ներդրումն է ունենում այդ համաձայնագրի իրականացման գործում»,- հավելել է նա՝ նշելով, որ ուրախ են տեսնել ՀՀ կառավարության՝ դատական համակարգի բարեփոխումների ռազմավարությունը: