Ապրիլյան դեպքերի ամբողջական բացահայտում չի լինելու առանց Սերժ Սարգսյանին լսելու: Այս մասին այսօր՝ նոյեմբերի 28-ին, ԱԺ-ում լրագրողների հետ զրույցում նշեց ԱԺ Ապրիլյան պատերազմի հանգամանքներն ուսումնասիրող քննիչ հանձնաժողովի նախագահ Անդրանիկ Քոչարյանը:
«Ակնհայտ է, որ Սերժ Սարգսյանը հրավիրվելու է: Մամուլին հետեւելով ինքներդ էլ տեսնում եք, որ կան անհանգստություններ, որ այսպես թե այնպես հրավիրվելու են եւ պետք է պատրաստ լինեն գալու: Չգալն էլ իրենց իրավունքն է, ոչ մեկին հանձնաժողովը իրավունք չունի պարտադրելու: Բայց այս պահի դրությամբ որեւէ զինվորական չի մերժել: Ներդաշնակ աշխատում ենք: Կգան թե չեն, գա, չգիտեմ, բայց եթե չգան, ոչ մի կաշկանդվածություն չունենք մեր հարցերը հնչեցնելու: Չգալը շատ լուրջ քաղաքական պատասխանատվություն է լինելու, չգալ հանձնաժողով, որը միտված է ճշմարտությունը բացահայտելուն»,-ասաց նա:
Քոչարյանը նաեւ հավելեց. «Մենք ունենք մեզ հետաքրքրող բազմաթիվ հարցերի չպարզաբանված հանգամանքներ, ունեցել ենք խոչընդոտներ, բայց դրանք հաղթահարելով գնում ենք առաջ: Միայն Զինված ուժերը չեն, պատրաստվում ենք հրավեր ուղարկել այլ ուժային կառույցներ, որոնք այդ ժամանակ պետք է որ տիրապետեին մեզ հետաքրքրող տեղեկատվությանը»: