![](img/news/05/47/79/default.jpg)
Գյումրիում բնապահպանները անհանգստացած են. Շիրակի մարզի առանց այն էլ սակավաթիվ կանաչ գոտիները ավելի են նվազել եւ անտառների վերականգնման համար անհրաժեշտ են տարիներ: Ըստ բնապահպանների` անտառտնտեսության 60 տոկոսն է միայն պահպանված: Նրանք գտնում են, որ խնդիրը մտահոգիչ պետք է լինի, ոչ միայն բնապահպանների համար, այլ նաեւ կառավարական մակարդակի մոտեցում է անհրաժեշտ:
Գյումրիի Անտառտնտեսության գլխավոր մասնագետ Աշոտ Վալեսյանի կարծիքով` Շիրակի մարզում վերջին տարիներին ծառահատումներ գրեթե չեն կատարվել, սակայն ոչ այն պատճառով, որ վերահսկողությունն է ուժեղացել, այլ անտառային տարածքների թիվն է նվազել:
«Մասնակի ծառատունկեր կատարվել են, բայց դա խնդրի լուծում չէ: Բնապահպանության նախարարությունը պետք է այս առումով լուրջ քայլել ձեռնարկի»,-NEWS am-ի թղթակցի հետ զրույցում ասել է Աշոտ Վալեսյանը:
Օրերս էլ բնապահպանները դիմում-նամակ են ուղարկել Բնապահպանության եւ Գյուղատնտեսության նախարարներին` պահանջելով դադարեցնել Հայաստանի անտառների ոչնչացումը: Ըստ բնապահպանների` պաշտոնական տվյալները, որ հրապարակում է բնապահպանության նախարարությունը, իրականությունից հեռու են:
«Մեր անտառային տարածքները ոչ միայն չեն ավելացել, այլ նաեւ կրճատվել են: Օրենքները, որ մշակվում են անտառծածկույթը պահպանելու ուղղությամբ, այդպես էլ մնում է թղթի վրա»,- ասել է նա: Գյումրիում գործող «Գեոֆոն» բնապահպանական ՀԿ-ի նախագահ Լեւոն Մարտիրոսյանի համոզմամբ, խնդիրը տարիներ շարունակ անհանգստացնող է եղել, բազմիցս է այդ մասին տեղյակ պահվել, սակայն գործնական քայլեր այդ ուղղությամբ չեն կատարվել:
«Մեզ այլ բան չէր մնում, քան խնդիրը բարձրացնել պետական մակարդակով»,-ասել է բնապահպանը: Իսկ Ֆեդերիկ Գասպարյանը հավելել է. «Պետական մարմինները պետք է հասկանան, որ անտառը ֆինանսավորման աղբյուր չէ, ռեսուրս չէ, որը պետք է վաճառել` գումար վաստակելու համար, այլ ապրելու անհրաժեշտ պայման է: Ավելին. անտառների վերականգնման համար անհրաժեշտ են տարիներ»: