Բրյուսելում հայերի կողմից կազմակերպված «Թուրքիայում հայ լինել» անունը կրող կոնֆերանսին մասնակցել եւ ելույթով հանդես է եկել հայտնի թուրք գրող Քեմալը Յալչընը:
Թուրքական Atilim-ի փոխանցմամբ` թուրք գրողն իր ելույթի սկզբում հայերենով, ասորերենով եւ թուրքերենով ողջունել է մասնակիցներին: Քեմալ Յալչընը պատմական անդրադարձ է կատարել` շեշտելով, որ եթե Ցեղասպանություն տեղի ունեցած չլիներ, այսօր Թուրքիայում կապրեր 15 մլն ոչ մահմեդական:
«Պատմությունը մարդկության դեմ իրականացված հանցանքները երբեք չի ներել: Մեր ապրած ցավերը թող մնայուն խաղաղության եւ արդարության հիմքը լինեն: Ես որպես թուրք գրող, հայերից եւ ասորիներից ներողություն եմ խնդրում: Ցանկանում եմ, որ Հայաստանի եւ Թուրքիայի սահմանին գտնվող Մետաքսի ճանապարհի կամուրջը (Անիի պատմական կամուրջը) վերանորոգվի եւ խորհրդանշի հայ եւ թուրք ժողովուրդների եղբայրությունը: Մի օր էլ այդ կամուրջի մոտ կհանդիպենք եւ գավաթ կբարձրացնենք»,-եզրափակել է իր խոսքը Քեմալ Յալչընը:
Նշենք, որ Գերմանիայում հաստատված թուրք գրողը հեղինակել է «Սարը գելին» վեպը, որի մեջ նկարագրել է Հայոց ցեղասպանությունից փրկված հայերի պատմությունը, ովքեր ստիպած են եղել իրենց քուրդ ներկայացնել: