Արագածոտնի մարզի Կոշ համայնքում դեկտեմբերի 8-ին կայացած համայնքի ղեկավարի ընտրություններին հաղթել է համայնքի նախկին ղեկավար, անկուսակցական Աշոտ Ենգիբարյանը՝ 689 ձայնով: Այս մասին տեղեկանում ենք ԿԸՀ կայքից:
Թեկնածուներից Էդմոն Ադամյանը ստացել է 376, իսկ Արմեն Ավետիսյանը` 427 ձայն:
NEWS.am-ի հետ զրույցում հաղթած թեկնածուն ասաց, որ ինքն արդեն 5-րդ անգամ է հաղթում համայնքի ղեկավարի ընտրություններում, իսկ «Իմ քայլը» խմբակցության պատգամավոր Վիկտոր Ենգիբարյանի հետ հեռու ազգականներ են, ոչ թե հորեղբոր որդիներ:
«Նույն ազգի տղաներ ենք, նույն գեներից ենք, բայց հորեղբոր տղան չեմ: Ես նրան ԱԺ ընտրություններից հետո չեմ տեսել, եւ ինքը չէր կարող ազդել: Ես արդեն 5-րդ անգամ եմ ընտրվում, եւ էն 4 անգամը, որ ընտրվել եմ, ինքը ոչ պատգամավոր է եղել, ոչ էլ երեւացող դեմք է եղել, որ կարողանար ընտրության ընթացք փոխեր: Միամտություն եւ անմտություն կլինի, որ իմ արդեն 5-րդ հաղթանակը կապենք Վիկտորի անվան հետ, այս ընտրությունները նախորդ 4-ի տրամաբանական շարունակությունն է»,-ասաց նա:
Նշենք, որ Աշոտ Ենգիբարյանը պաշտոնավարում է 2005 թվականից` արդեն 14 տարի:
