ՀՀ երկրորդ նախագահ Ռոբերտ Քոչարյանի որդին՝ Լեւոն Քոչարյանը քիչ հավանական է համարում այն, որ հայրը կարող է ամանորին լինել ազատության մեջ։ Այս մասին այսօր՝ դեկտեմբերի 16-ին, Վերաքննիչ դատարանում ընթացող Ռոբերտ Քոչարյանի դատավարությանն ասաց Լեւոն Քոչարյանը։
«Չնայած քիչ հավանական եմ համարում, դեռ դատավարությունն ընթանում է։ Դեռ դատ կա, տեսնենք՝ ինչ կլինի։ Անցած տարի էլ էր նույն ձեւ, մենք խնդիր չենք տեսնում այդ ամենի մեջ, պայքար է, պայքարի մեջ ենք։
Պատրաստ ենք պայքարի, մինչեւ արդարությունը կվերականգնվի»,- ասաց Լեւոն Քոչարյանը։
Լեւոն Քոչարյանի համոզմամբ՝ դատավորները վախենում են ի օգուտ Ռոբերտ Քոչարյանի որոշում կայացնել․ «Շատ լավ հասկանալով՝ ինչ է ակնկալում իրենից իշխանությունը, նրանք դրա մասին անգամ բացահայտ են խոսում»։
Լևոն Քոչարյանն ասաց, որ հայրը առողջական լուրջ խնդիրներ չունի․ «Հետվիրահատական որոշ բաներ պետք է արվեր, լուրջ բան չկա»։
Նշենք, որ Ռոբերտ Քոչարյանն այս օրերին հետվիրահատական բուժզննում է անցնում «Իզմիրլյան» բժշկական կենտրոնում:
