![](img/news/55/02/19/default.jpg)
Փոխվարչապետ Մհեր Գրիգորյանն ընդունել է Տնտեսական համագործակցության զարգացման կազմակերպության գլխավոր քարտուղարի տեղակալ Լյուդգեր Շուկնեխտին:
Ողջունելով պարոն Շուկնեխտկին՝ փոխվարչապետը կարեւորել է ՏՀԶԿ-ի հետ տարբեր հարթակներում ձեւավորված կառուցողական համագործակցությունը: Փոխվարչապետը ներկայացրել է հարկային վարչարարության եւ բիզնես միջավայրի բարելավման ուղղությամբ արդեն իսկ իրականացվող եւ առաջիկայում իրականացվելիք բարեփոխումները:
Տնտեսական համագործակցության զարգացման կազմակերպության գլխավոր քարտուղարի տեղակալ Լյուդգեր Շուկնեխտը, շնորհակալություն հայտնելով ընդունելության համար, ընդգծել է, որ Հայաստանի հետ ձեւավորվել է հաջող համագործակցություն եւ ՏՀԶԿ-ի համար ակնհայտ են Կառավարության՝ երկրի զարգացմանը միտված քայլերը:
Զրուցակիցները երկուստեք կարեւորել են այս տարի փետրվարին ՏՀԶԿ BEPS (հարկման բազայի քայքայման եւ շահույթի տեղափոխման) ներառական հարթակին Հայաստանի անդամակցությունը եւ առաջիկայում դրանով պայմանավորված գործողությունների արդյունավետ եւ ժամանակին իրականացումը: Փոխվարչապետը նշել է, որ ՀՀ կառավարությունը, կարեւորելով այս հարթակին Հայաստանի անդամակցությունը, այն նաեւ որպես միջոցառում ներառել է ՀՀ-ԵՄ Համապարփակ եւ ընդլայնված գործընկերության համաձայնագրի ճանապարհային քարտեզում:
Մհեր Գրիգորյանը եւ Լյուդգեր Շուկնեխտը հանդիպման ընթացքում անդրադարձել են նաեւ տնտեսության թվայնացման կարեւորությանը, կապիտալ շուկայի զարգացմանը, կանխիկի շրջանառության կրճատմանը եւ Հայաստանի ներդրումային գրավչության բարձրացման հնարավորություններին: