Ղարաբաղի վերաբերյալ վարչապետ Նիկոլ Փաշինյանի հայտարարությունները կարող են Ադրբեջանի համար «քարտ-բլանշ» դառնալ: Այս մասին դեկտեմբերի 24-ին տարվա արդյունքների ամփոփման համաժողովում ասաց «Պոլիտէկոնոմիա» հետազոտական ինստիտուտի տնօրեն Անդրանիկ Թեւանյանը:
Նրա խոսքով՝ այդպիսի հայտարարություններին են դասվում հետեւյալ արտահայտությունները. «Արցախը Հայաստան է, եւ վերջ», «Ղարաբաղում մարդիկ կան, որոնք կարող են դավադրական պատերազմ հրահրել», «Անհրաժեշտ է պարզել, թե որ կողմից են կրակում», «Ես բանակցություններ չեմ վարում» եւ այլն: «Հայաստանի իշխանությունները չեն ցանկանում ղարաբաղյան հիմնախնդրով պատասխանատվություն ստանձնել, այլ հետապնդում են դրանից խուսափելու նպատակ, Ղարաբաղին ներգրավել բանակցություններին եւ մենակ թողնել»,- վստահ է փորձագետը:
Թեւանյանը կարեւորեց Ղարաբաղում արժանավոր, ժողովրդավարական ընտրությունների անցկացումը՝ առանց դրսի միջամտության: «Սա կդառնա Ղարաբաղի սուբյեկտության մեծացման լուրջ գործոն»,- հավելեց նա:
