2019 թվականին զբոսաշրջիկները փորձել են իտալական Սարդինիա կղզու լողափերից դուրս բերել ընդհանուր առմամբ ավելի քան 10 տոննա ավազ, հայտնում է «ՌԻԱ Նովոստի»-ն՝ վկայակոչելով «Գողացված եւ թալանված Սարդինիա» հասարակական ասոցիացիայի ակտիվիստներին:
Գործակալության զրուցակիցների տեղեկություններով՝ Կալյարիի օդանավակայանում առգրավվել է շուրջ 6 տոննա ավազ, խեցիներ եւ մանրաքարեր, եւս մոտ 4 տոննա՝ Օլբիում եւ Ալգերոյում: «Սակայն այս թվերը ամենեւին չեն արտացոլում բոլոր կորուստները, որոնք կրում են մեր լողափերը: Սա դրանց միայն փոքր մասն է»,- նշել են ասոցիացիայի ներկայացուցիչները:
Սարդինիայում ընդհանուր կա ավելի քան 250 լողափ, ընդ որում՝ այստեղ ավազի գույնը տատանվում է ձյունափայլից մինչեւ մուգ վարդագույն: Տեղական իշխանությունները 2017 թվականին օրենք էին ընդունել, որն արգելում է լողափերից բոլոր տեսակների ավազի եւ խեցիների դուրսբերումը: Խախտողների համար տուգանքը կարող է կազմել 500-ից մինչեւ 3 հազար եվրո: Դրանից բացի, նման գործողությունները կարող են որակվել որպես ավազի ապօրինի արդյունահանում, որը պատժվում է արդեն 1549-ից մինչեւ 9296 եվրո տուգանքով: