ԱՄՆ-ը դրսեւորում է «Իսլամական պետություն» ահաբեկչական կազմակերպությանը բնորոշ վարքաիգծ՝ սպառնալով ոչնչացնել Իրանի հնագույն մշակութային հուշարձանները: Այդ մասին ուրբաթ հայտարարել է Իրանի արտաքին գործերի նախարար Մոհամադ Ջավադ Զարիֆը:
«ԱՄՆ-ի վարքագիծը նման է ԻՊ-ի վարքագծին, երբ սպառնում է ոչնչացնել Իրանի հնագույն մշակութային ժառանգությունը»,-Իրանի ԱԳ նախարարի խոսքերը մեջբերում է IRNA տեղեկատվական գործակալությունը:
Զարիֆը շեշտել է «ԱՄՆ-ի միակողմանի գործողությունների քայքայիչ բնույթը, դրանց բացասական ազդեցությունը միջազգային նորմերի վրա»: «Եթե մյուս երկրները չհակազդեն ԱՄՆ-ի այդ քաղաքականությանը, նրանք բարձր գին կվճարեն»,-ընդգծել է նա:
Իրանցի նախարարի խոսքերն ԱՄՆ-ի նախագահ Դոնալդ Թրամփի հայտարարությանն ուղղված հերթական արձագանքն էր. հունվարի 4-ին Թրամփը հայտարարել էր, որ ի պատասխան Իրանի կողմից ցանկացած պոտենցիալ հարձակման՝ Միացյալ Նահանգները շատ արագ եւ շատ հզոր հարվածներ կհասցնեն Իրանի 52 օբյեկտների ուղղությամբ, որոնցից մի քանիսը բավականին մեծ կարեւորություն ունեն Իրանի եւ իրանական մշակույթի համար:
Մերձավոր Արեւելքում դրությունը կտրուկ սրվել էր հունվարի 3-ին Բաղդադի օդանավակայանի շրջանում ԱՄՆ-ի կողմից իրականացված հրթիռային հարվածներից հետո, որոնց հետեւանքով զոհվել էր Իսլամական հեղափոխության պահապանների կորպուսի (Իրանի ԶՈՒ Էլիտար ստորաբաժանում) «Ալ Քուդս» հատուկ նշանակության ուժերի հրամանատար Ղասեմ Սոլեյմանին:
Հունվարի 8-ի լույս գիշերը Թեհրանը պատասխան հրթիռային հարված էր հասցրել Իրաքում ԱՄՆ-ի երկու օբյեկտների՝ Այն էլ Ասադ ռազմաբազայի եւ Էրբիլ օդանավակայանի ուղղությամբ: