Մենք ակնկալում ենք, որ ադրբեջանական գերության մեջ հայտնված մարդու սպանության կամ մահվան ելքի վիճակի հասցնելու հիման վրա ՄԻԵԴ-ը նախադեպային իրավունքով կընդունի նման որոշումներ Կարեն Պետրոսյանի եւ Մամիկոն Խոջոյանի գործերով, հաշվի առնելով, որ մեկն սպանվել է, իսկ երկրորդը մահացել կտտանքներից։ Այս մասին NEWS.am-ի թղթակցի հետ զրույցում ասել է Հայաստանի առաջին օմբուդսմեն, իրավապաշտպան Լարիսա Ալավերդյանը։
Նրա խոսքով՝ երբեմն կարելի է կասկածել ՄԻԵԴ դատավորների ընդունած որոշումների բացարձակ օբյեկտիվությանը։
«Բայց այս դեպքում պետք է բարձր գնահատել Եվրոպական դատարանի որոշումը Մանվել Սարիբեկյանի գործով։ Զարմացնում է միայն 60 հազար եվրո գումարը որպես զոհվածի ընտանիքի բարոյական վնասի փոխհատուցում։ Կցանկանայի, որ ՄԻԵԴ-ը ավելի համարժեք գնահատեր փոխհատուցման գումարը մարդու կյանքի համար»,- նշել է նա։
Հիշեցնենք, որ հունվարի 30-ին Մարդու իրավունքների եվրոպական դատարանը որոշում էր կայացրել ադրբեջանական կողմից գերված հայ հովիվ Մանվել Սարիբեկյանի գործով։
Դատարանը որոշել է, որ Մանվել Սարիբեկյանի մահվան հետ կապված՝ տեղի է ունեցել Մարդու իրավունքների կոնվենցիայի հոդված 2-ի (կյանքի իրավունքի) խախտում, Կոնվենցիայի 2-րդ հոդվածի խախտում Մանվել Սարիբեկյանի մահվան հետաքննության անհամարժեքության մասով եւ հոդված 3-ի խախտում (արգելում է կտտանքները եւ «անմարդկային» կամ արժանապատվությունը նվաստացնող վերաբերմունքը կամ պատիժը)։
Դատարանը պարտավորեցրել է Ադրբեջանին հայցվորներին վճարել 60 հազար եվրո որպես բարոյական վնասի փոխհատուցում եւ 2200 եվրո որպես դատական ծախսերի փոխհատուցում։
Հայաստանի քաղաքացի Մանվել Սարիբեկյանը ադրբեջանական ԶՈւ-ի կողմից գերվել էր Շամշադինի ուղղությամբ 2010 թվականի սեպտեմբերի 11-ին։
Հոկտեմբերի 5-ի գիշերը Սարիբեկյանը, գտնվելով ադրբեջանական բանտում, իբր, կախվել է։ Հայկական կողմը կարծում է, որ Սարիբեկյանը կամ սպանվել է, կամ հասցվել ինքնասպանության։ Դա հաստատվում է նրանով, որ ադրբեջանական կողմը մեկ ամիս հրաժարվել է վերադարձնել Սարիբեկյանի մարմինը։ Նոյեմբերի 4-ին ադրբեջանական կողմը հանձնել է Մ.Սարիբեկյանի մարմինը Հայաստանին։
Նշենք, որ Տավուշի մարզի Վերին Կարմիրաղբյուր գյուղի 77-ամյա բնակիչ Մամիկոն Խոջոյանը զոհվել է 2014 թվականի գարնանը ներարկման հետեւանքով, որն արվել է ադրբեջանական բանտում գտնվելու ժամանակ։
2014 թվականի ամռանը Տավուշի մարզի Չինար գյուղի 31-ամյա բնակիչ Կարեն Պետրոսյանը հատել է հայ-ադրբեջանական պետական սահմանը եւ հայտնվել ադրբեջանական գերության մեջ։ Դրանից հետո ստացվել է տեղեկություն Կարեն Պետրոսյանի մահվան մասին։
