Թուրք-իսրայելական հարաբերությունների վատթարացումը չի կարող պատրվակ լինել, որ Իսրայելը ճանաչի Հայոց ցեղասպանությունը: Այդ մասին ապրիլի 19-ին կայացած մամուլի ասուլիսում հայտարարել է Հայաստանի հրեական համայնքի ղեկավար Ռիմա Վարժապետյան-Ֆելլերը:
«Իսրայելը քաղաքակիրթ պետություն է, այդ պետության գործիչները գիտեն, թե ինչ կհետեւի Հայոց ցեղասպանության ճանաչման փաստին: Դա կազդի Իսրայելի անվտանգության եւ տնտեսության վրա: Թուրքիայի հետ փոխհարաբերությունները երբեք չի կարելի դնել կշեռքի նժարի վրա` որքան վատ, այնքան լավ սկզբունքով: Ես կոչ եմ անում գործել բացառապես պարկեշտ քաղաքակիրթ մեթոդներով»,- նկատել է համայնքի ղեկավարը:
Հարցին, թե արդյոք Իսրայելը բավարար քաղաքակիրթ պետություն չէ՞, որ ճանաչի հայոց ցեղասպանությունը, եթե հաշվի առնենք, որ հրեա ժողովուրդն ինքը ցեղասպանություն է վերապրել, Վարժապետյան-Ֆելլերը նշել է. «Ես համաձայն եմ, որ հրեա ժողովրդն իր մաշկի վրա զգացել է այդ ողբերգությունը: Հրեական աշխարհը ճանաչում է Հայոց ցեղասպանությունը: Եւ հրեաներն Իսրայելում ճանաչում են Ցեղասպանության փաստը, շատերը ոչ մի բան չգիտեն: Սակայն կան քաղաքական, տնտեսական պահեր, այլ երկրների հետ փոխհարաբերություններ: Դրանց մասին չի կարելի մոռանալ»:
