Մի շարք այլ հարցերից բացի, Վաշինգտոնն ու Անկարան քննարկում են Թուրքիայի հայցը Սիրիայի հետ սահմանին ամերիկյան Patriot զենիթահրթիռային համալիրները տեղադրելու մասին, հայտարարել է ԱՄՆ նախագահ Դոնալդ Թրամփը, հաղորդում է ՏԱՍՍ-ը:
Թրամփին հարցրել էին՝ խոսել է արդյոք նա իր թուրք գարծընկերոջ հետ Անկարայի խնդրանքի, ինչպես նաեւ Սիրիայում թուրք զինվորականների մահվան մասին: «Մենք շատ ենք խոսում նախագահ Էրդողանի հետ: Եւ մենք քննարկում ենք հենց այն, ինչի մասին խոսել ենք»,-պատասխանել է Թրամփը:
Սիրիական Իդլիբ նահանգում իրավիճակի հերթական սրումը տեղի է ունեցել փետրվարի 28-ի գիշերը: Թուրքական կողմը պնդել է սիրիական կառավարական ուժերի հարվածի հետեւանքով 36 թուրք զինծառայողների մահվան մասին: Այնուհետեւ Թուրքիայի Զինված ուժերը հարվածել էին սիրիական դիրքերի ուղղությամբ՝ ավելի ուշ հայտարարելով, որ խոցվել է ավելի քան 200 թիրախ:
