Երեւանը եւ Թբիլիսին արդեն պայմանավորվել են վրացական տարածքի միջով իրանական ապրանքներով հայկական բեռնատարների տարանցման շուրջ: Այս մասին մարտի 4-ին ԱԺ նիստում ասաց ՀՀ վարչապետ Նիկոլ Փաշինյանը՝ պատասխանելով պատգամավորների հարցերին:
Վարչապետի խոսքով՝ տվյալ հարցը քննարկել են Վրաստանի վարչապետ Գեորգի Գախարիայի հետ:
«Մենք պայմանավորվել ենք, որ հաջորդ տարանցումը կիրականացվի Վրաստանի տարածքով, եւ եթե ընդունող կողմը դեմ չէ, ապա մեքենաները կհասնեն մինչեւ նշանակակետեր»,- պարզաբանեց Փաշինյանը:
Նա նշեց, որ չորեքշաբթի արդեն պարզվել է, որ ընդունող կողմը՝ Ռուսաստանը, որեւէ նոր պայման չի ներկայացնում բեռների ընդունման համար:
Վարչապետի խոսքով՝ Վրաստանի իշխանությունները չէին ցանկանա իրենց մոտ սահմանին բեռնատարների կուտակում, եթե երրորդ երկրները չցանկանային ընդունել բեռը:
Նա հայտնեց, որ բեռնատարները կկարողանան շարունակել ճանապարհը մարտի 4-ին կամ 5-ին:
Նշենք, որ մարտի 3-ին հայտնի է դարձել, որ իրանական ապրանքներով մոտ 60 հայկական բեռնատարներ կուտակվել են Վրաստանի հետ սահմանին: