Ռազմավարության տեսանկյունից իշխանությունը դեռ չգիտի՝ ինչպես քարոզչություն անցկացնել եւ դեռեւս սահմանափակվում է վարչապետ Նիկոլ Փաշինյանի եւ քաղաքացիների ուղիղ շփմամբ: Այս մասին մարտի 9-ին լրագրողների հետ հանդիպման ժամանակ ասաց քաղտեխնոլոգ Կարեն Քոչարյանը:
Նա հավելեց, որ սկզբնապես իշխանությունները ձգտում էին քարոզարշավ անցկացնել «սեւերի» եւ «սպիտակների» հակազդեցության շրջանակում, սակայն ընդդիմադիր ուժերի որեւէ մեկը չմասնակցեց այդ խաղին: ««ՈՉ» նախաձեռնությունն իրենց վրա վերցրեցին փաստաբանները, սակայն նրանց ռազմավարությունը եւս դեռ անհասկանալի է»,- նկատեց նա:
Քոչարյանի խոսքով՝ հանրաքվեն ապոկալիպսիս չէ, այլ սովորական երեւույթ: «Խնդիրը միայն այն է, թե կկարողանան իշխանությունները 650 հազար ձայն հավաքել: Ցանկացած դեպքում նրանց արձագանքն արդեն կանխատեսելի է: Եթե նրանց չհաջողվի հավաքել այդ ձայները, ապա դա կգնահատվի որպես ժողովրդավարության եւ բազմակարծության հաղթանակ, իսկ հաղթանակի դեպքում կհռչակվի հեղափոխության հաղթանակը»,- նշեց քաղտեխնոլոգը:
Հիշեցնենք, որ Սահմանադրության մեկ հոդվածում փոփոխություններ կատարելու մասին հանրաքվեն նախատեսված է ապրիլի 5-ին: Իշխանություններն առաջարկել են վաղաժամկետ դադարեցնել Սահմանադրական դատարանի 7 եւ 9 անդամների լիազորությունները, ներառյալ` դրա նախագահի` նրանց նախկին «ռեժիմի» ներկայացուցիչներ անվանելով: Գրեթե բոլոր քաղաքական ուժերը, բացառությամբ իշխող «Իմ քայլը» դաշինքի եւ նախկին նախագահ Լեւոն Տեր-Պետրոսյանի Հայ ազգային կոնգրեսի, հրաժարվել են մասնակցել այդ գործընթացին` այն, մեղմ ասած, իրավականորեն խոցելի անվանելով: Պատասխանը դրական կհամարվի ոչ միայն այն դեպքում, եթե «ԱՅՈ» ասի ընտրողների կեսից ավելին, այլ նաեւ` ընտրողների ցուցակի առնվազն մեկ քառորդի դեպքում, այսինքն` մոտ 650 հազար մարդու: