Այս ծոցը Պարսից է կոչվում, եւ ոչ թե` Նյույորքյան կամ Վաշինգտոնյան: Այս մասին հայտարարել է Իրանի նախագահ Հասան Ռոհանին, հայտնում է IRNA-ն:
«Ամերիկացիները պետք է հասկանան իրավիճակը եւ ամեն օր նոր դավադրություններ չպատրաստեն Իրանի ժողովրդի դեմ` հաշվի առնելով Պարսից ծոցի անվանումը եւ այն ժողովրդին, որը հազարամյակներ շարունակ պաշտպանել է այս ջրային ճանապարհը»,- նշել է Ռոհանին:
Իրանի նախագահը Պարսից ծոցն աշխարհի խոշորագույն էներգետիկ կենտրոններից մեկն է անվանել: «Պարսից ծոցը շատ կարևոր եւ զգայուն գոտի է: Պարսից ծոցը մեզ համար կարեւոր պատմական ճանապարհ է, իհարկե, մեր բոլոր ջրային ճանապարհներն են կարեւոր, բայց Պարսից ծոցն ու Օմանի ծովը կարեւոր են դեպի ազատ ջրերը մուտքի շնորհիվ»,- պարզաբանել է Ռոհանին:
Նրա խոսքով` Իրանի զինված ուժերը, այդ թվում` Իսլամական հեղափոխության պահապանների կորպուսը, միշտ պաշտպանել եւ պաշտպանելու են Պարսից ծոցը: «Պարսից ծոցը պատկանում է իրանցի ժողովրդին, ինչպես եւ միշտ է եղել»,- եզրափակել է նա: