Մոտ վեց ամսից Մ-4 միջպետական ճանապարհի վրա որակի հետ կապված խնդիրներ են առաջացել, ճանապարհը քանդվել է, ճաքեր են հայտնվել: Այս մասին մայիսի 7-ին Հայաստանի Ազգային ժողովի նիստին կառավարության 2019 թվականի կատարողականի վերաբերյալ զեկույցի քննարկման ժամանակ ասաց «Լուսավոր Հայաստան» կուսակցության պատգամավոր Սարգիս Ալեքսանյանը` դիմելով տարածքային կառավարման եւ ենթակառուցվածքների նախարար Սուրեն Պապիկյանին:
Այնուհետեւ պատգամավորը հետաքրքրվեց նախարարից, թե ինչ քայլեր են ձեռնարկվում` հետագայում նման դեպքերից խուսափելու համար: «Մովսես գյուղ տանող ճանապարհն ամբողջովին վերանորոգվում է: Աշխատանքները ֆինանսավորվում են Ռուսաստանից քաղաքացիների եւ կառավարության կողմից: Եղանակային պայմանների պատճառով նախորդ տարի հնարավոր չեղավ իրականացնել աշխատանքները»,- պարզաբանեց նախարարը` հավելելով, որ տաքանալուն պես աշխատանքները կշարունակվեն:
Միեւնույն ժամանակ, անդրադառնալով Մ-4 ճանապարհի հետ կապված խնդիրներին, Պապիկյանը հայտարարեց, որ ինքն անձամբ է ներկա եղել եւ տեսել է ծագած բոլոր խնդիրները: «Լավ չէ, երբ կատարված աշխատանքը թերություններով է կատարվում: Մենք սկզբունք ունենք. եթե որեւէ ճանապարհաշինարարական ընկերության մոտ թերություններ են առաջանում, ապա ճանապարհը նորից ամբողջությամբ ասֆալտապատվում է` ասֆալտի նոր շերտ դնելու միջոցով»,- շեշտեց նախարարը: