Հայ-իրանական հարաբերությունները բնականոն զարգանում են։ Այս մասին այսօր՝ մայիսի 16-ին, իր մեծ ասուլիսի ժամանակ ասաց ՀՀ վարչապետ Նիկոլ Փաշինյանը՝ անդրադառնալով այն հարցին, թե վերլուծական շրջանակները մտահոգություն են հայտնում հայ-իրանական հարաբերությունների ներկայիս մակարդակի շուրջ, մասնավորապես, հիշեցնում են, որ տարեսկզբին գեներալ Սոլեյմանի սպանության հետ կապված ՀՀ կառավարությունը մեր հարաբերություններին անհամարժեք արձագանք դրսեւորեց, ինչպես նաեւ հարեւան երկրում տեղի ունեցած ողբերգական առիթով, երբ զորավարժություններին զոհվեց 19 մարդ, անգամ ԱՄՆ-ն ցավակցություն է հայտնել, բայց ոչ Հայաստանը. ի՞նչ վիճակում են այսօր հայ-իրանական հարաբերությունները։
Վարչապետն ասաց, որ նշված ժամանակահատվածում Արտաքին գործերի նախարարը մի քանի հեռախոսազրույց է ունեցել իր գործընկերոջ հետ. «Ես հեռախոսազրույց եմ ունեցել Իրանի Իսլամական Հանրապետության նախագահի հետ։ Մենք պայմանավորվել ենք, որ մեր շփումները պետք է շարունակենք, որպեսզի կորոնավիրուսի բերած իրավիճակները հնարավորինս շուտ հաղթահարենք։ Մեր Կառավարության տարբեր նախարարներ կապի մեջ են իրենց գործընկերների հետ։ Մեր հարաբերությունները բնականոն զարգանում են»։