Իշխող խմբի ներկայացուցիչները թող հետեւեն ԱԼԴԵ խմբի հայտարարություններին. այդ խումբն արդեն իսկ հայտարարություն է արել` դատապարտելով ԱԺ-ում մայիսի 8-ին կատարվածը: Այս մասին NEWS.am-ի հետ զրույցում ասաց ԱԺ «Լուսավոր Հայաստան» խմբակցության պատգամավոր Տարոն Սիմոնյանը՝ անդրադառնալով Ազգային ժողովում տեղի ունեցած ծեծկռտուքի վերաբերյալ ԱԼԴԵ խմբի արձագանքին:
«Պետք չէ միֆական դաշտ մտնել` կասկածի տակ դնելով այդ խմբի հայտատարությունը»,-ասաց նա:
Տարոն Սիմոնյանը նշեց, որ նմանատիպ դեպքերը չեն կարող անարձագանք մնալ, իսկ այդ խմբի հայտարարությունն էլ իր ասածի ապացույցն է. «Մեր բոլոր գործընկերները ԵՄ-ում կամ Եվրոպայի խորհրդում տեսել են այն ամենը ինչ տեղի է ունեցել եւ արձագանքել են: Որոշներն արձագանքել են հրապարակայնորեն, որոշները` ոչ հրապարակայնորեն»,- ասել է Տարոն Սիմոնյանը:
Հարցին, թե միջազգային հարթակներում այս միջադեպն ի՞նչ հետեւանք կարող է ունենալ, պատգամավորը պատասխանեց. «Միանշանակ բացասական, քանի որ վարկանիշի հետ կապված խնդիր է, ամեն դեպքում մենք քաղաքակիրթ ազգ ենք եւ մեզ հարիր չեն նման գործողությունների կատարումը: Եթե կարող ենք խոսքի միջոցով փորձել հասկանալ միմյանց, ապա բռունցքների միջոցով ինչո՞ւ ենք փորձում ինֆորմացիա փոխանցել մեկս մյուսին:
Մեր եվրոպացի գործընկերները ակնկալում են մեզանից, որ մենք խոսքի միջոցով կհասնենք ավելի բարենպաստ եւ առողջ քաղաքական միջավայրի, քան այն միջոցներով, որը տեղի ունեցավ: Սա անհանդուրժողականության մթնոլորտ է ենթադրում եւ նաեւ բռնություն կոնկրետ ընդդիմության ներկայացուցչի, ղեկավարի նկատմամբ, սա անընդունելի է, ինչը նշել են նաեւ մեր եվրոպացի գործընկերները»,- ասել է նա:
Անդրադառնալով այս գործի իրավական տեսանկյունին, ըստ Տարոն Սիմոնյանի կայացված որոշումը սխալ է, քանի որ Քննչական կոմիտեն այն ճանապարհով է տարել գործը, թե իբրեւ ծեծի հանցակազմ առկա չէ, որը հիմնավորել է Վճռաբեկ դատարանի այն նախադեպքով, որ ծեծը երկու կամ ավելի հարվածի առկայությունն է: «Սակայն տեսահոլովակում ակնհայտ է, որ Էդմոն Մարուքյանին առնվազն երեք հարված հասցվում է, տարբեր մարդկանց կողմից: Ավելին, եթե ծեծի հետ կապված խնդիր տեսնում էր Քննչական կոմիտեն, ապա խուլիգանության հանցակազմի հետ խնդիր պետք է, որ չտեսներ, որը ակնհայտ է տվյալ պարագայում»,-ասաց պատգամավորը:
