Հայաստանի իշխանությունները ցանկանում են չեղարկել բնակարանի առաջնային շուկայում հիփոթեք ստանալիս եկամտահարկի վերադարձման ծրագիրը: Այս մասին հունիսի 8-ին ՀՀ Ազգային ժողովում մշտական խորհրդարանական հանձնաժողովների համատեղ նիստին 2019 թվականի պետական բյուջեի կատարողականի մասի զեկույցի քննարկմանն ասաց ՀՀ ֆինանսների նախարար Ատոմ Ջանջուղազյանը:
Նախարարի խոսքով՝ հիփոթեքի տոկոսների մարման համար քաղաքացիներին եկամտահարկի վերադարձման գործընթացը սկսել է իրականացվել 2015 թվականից, եւ նախապես դիտվում էր որպես հակաճգնաժամային միջոցառում, որը պետք է աջակցեր շինարարական ոլորտին: Նրա գնահատմամբ՝ սակայն ավելի ուշ պարզվեց, որ ծրագիրը վերածվել է բնակչության ապահովված շերտերի համար պետության հաշվին հարստանալու լրացուցիչ հնարավորության:
«Պետական բյուջեն չպետք է միջոց դառնա թանկարժեք տներ ձեռք բերելու համար: Մյուս կողմից՝ այս նախագիծը դիտվում էր որպես ժամանակավոր լուծում, քանի որ կառուցապատումը համարվում է եկամտաբեր ոլորտ: Հենց այս պատճառով ներդրվել էր սոցիալական տարրը, ներդրվել էին ընդհանուր արժեքի եւ 3 ամսվա կտրվածքով եկամտահարկի վերադարձման սահմանափակումները: Այդ քայլերի վերջնանպատակն էր այս ծրագրից աստիճանաբար հրաժարվելը»,- պարզաբանեց Ջանջուղազյանը:
Նախարարը նշեց, որ տների կառուցումը արտադրական ոլորտ չէ, եւ այն կապված չէ արտահանման հետ, ուստի չի մտնում Կառավարության ծախսերի առաջնահերթ ուղղությունների մեջ: «Հետեւաբար, այս ծրագրից աստիճանաբար հրաժարվելը եղել է մեր քաղաքականության ուղղություններից մեկը: Սրա հետ կապված ուղերձում նախագիծ կա, որ համատարած հայտարարագրումից կախված խորհրդարանի քննարկմանը կա՛մ կներկայացվի, կա՛մ չի ներկայացվի»,- շեշտեց Ջանջուղազյանը:
Նրա պարզաբանմամբ՝ այս նախագծով նախատեսվում է, որ Երեւանի կենտրոնում ծրագիրը կդադարի գործել: «Ծրագրվում էր, որ ընդունվելու դեպքում փոփոխությունը ուժի մեջ կմտներ 2022 թվականի հունվարի 1-ից: Բայց քանի որ հիմա մենք ստիպված ենք մոբիլիզացնել մեր հնարավորությունները, քանի որ չգիտենք, թե որքան երկար ենք ապրելու այս իրավիճակում, որոշվեց այն քննարկման ներկայացնել մեկ տարի ավելի շուտ»,- նշեց ֆինանսների նախարարը:
Նրա խոստովանությամբ՝ բացառված չէ, որ համապատասխան որոշումը կարող է ընդունվել մինչեւ 2021 թվականի հունվարի 1-ը: Ընդ որում՝ նախարարը նշեց, որ եթե իշխանությունները համատարած հայտարարագրում մտցնելու ժամանակ գնան հիփոեթեքի վճարումները հաշվանցելու հաշվին հարկային բազայի նվազեցման ճանապարհով, ապա իրենք կդիտարկեն այս ծրագրի ամբողջական չեղարկումը: