Բոլոր այն անձինք, որոնք ներկայացնում են որոշակի սպառնալիք այսօրվա իշխանության փոքր ցանկություններն իրականացնելու համար, նրանք բոլորը թիրախում են: Այս մասին այսօր՝ հունիսի 17-ին, լրագրողների հետ զրույցում նշեց ՀՅԴ անդամ, էկոնոմիկայի նախկին նախարար Արծվիկ Մինասյանը:
«Իրենք սկսել են քաղաքական ուժերից, այդ արշավը շարունակվելու է, հակաքաղաքական կեցվածքներով, վիրավորանքներով, պիտակավորումներով, հասարակությանը թշնամացնելով, քաղաքական ուժերի եւ հասարակության միջեւ սեպ խրելով եւ բնականաբար, քաղաքացիական հասարակության ներկայացուիչների, լրագրողների, բոլորի նկատմամբ իրականացվելու են բռնաճնշումներ»,-ասաց նա:
Անդրադառնալով ՀՅԴ-ի, «Հայրենիք» եւ «Մեկ Հայաստան» կուսակցությունների համախմբմանը, ՀՅԴ-ական գործիչն ասաց. «Մեր նպատակն է ձեւավորել այն համընդհանուր միջավայրը եւ համագործակցությունը, որ անհրաժեշտ դիմադրողականություն ցույց կտա իշխանության հակապետական, հակաքաղաքական, հակասահմանադրական վարքագծին»:
Հարցին, թե կա՞ հակակշիռ իշխանությանը, նա արձագանքեց. «Դրա համար եմ ասում, որ այս ուղղությամբ աշխատանքները պետք է շարունակվեն: Առաջիկայում ավելի լայն համախմբման ականատես կլինեք: Երբ այդ համախմբումը կլինի եւ դրա շրջանակում կներկայացվեն գործողությունների ծրագիրը, այնտեղ բոլոր հարցերի պատասխանները կտրվեն: Հստակ կնկարագրվի, թե որն է ելքն այս իրավիճակից»:
