Հայաստանում լուրջ խնդիրներ կան ֆեյք լուրերի մասով: Այս մասին հունիսի 17-ին ՀՀ Ազգային ժողովի նիստին Հեռուստատեսության եւ ռադիոյի ազգային հանձնաժողովի 2019 թվականի գործունեության վերաբերյալ զեկույցի քննարկման ժամանակ ասաց իշխող «Իմ քայլը» դաշինքի պատգամավոր Բաբկեն Թունյանը:
Ըստ նրա՝ վերջին շրջանում իրավիճակը սրվել է եւ երկրի առջեւ ծառացած հիմնական մարտահրավերներից մեկն է դարձել: «Բանը հասել է նրան, որ ակնհայտ ֆեյք լուրերը եւ ֆեյսբուքյան գրառումները կարող են հայտնվել էլեկտրոնային լրատվամիջոցներում եւ նույնիսկ գնալ որոշ հեռուստաալիքներ, եւ դա արվում է ոչ պատահական, այլ՝ լիովին համակարգված ձեւով: Սակայն հավաստի տեղեկատվությունը երբեք անվճար չի լինում, եւ նորությունները թանկ արժեն»,- ասաց քաղաքական թիմի ներկայացուցիչը, ով ակտիվորեն ֆեյքեր էր տարածում՝ լինելով ընդդիմության շարքերում եւ ոչ միայն:
Թունյանը նշեց, որ շատ քաղաքացիներ, տեսնելով մի քանի հարյուր լրատվական աղբյուր, կարծում են, որ տեղեկատվությունն անվճար է, սակայն սխալվում են, քանի որ իրենք վճարում են իրենց ուշադրությամբ: Ընդ որում, նման լրատվամիջոցները ֆինանսական ռեսուրսներ են ստանում մեկ այլ աղբյուրից, այդ թվում՝ գովազդի միջոցով, վճարներ քաղաքական կուսակցություններից, որոնց շահերին ծառայում է տվյալ տեղեկատվությանը:
Ըստ «Իմ քայլի» պատգամավորի՝ պայքարել ֆեյքերի հետ կարող են ինչպես օգտատերերը՝ լինելով ավելի ուշադիր տեղեկատվության նկատմամբ, այնպեսլ էլ կոմպետենտ փորձագետները, ովքեր իրենց ծանրակշիռ հայտարարությունների շնորհիվ բարձրորակ տեղեկատվություն կապահովեն, իսկ դա ի վերջո կհանգեցնի բնակչության մեդիագրագիտության բարձրացմանը: «Ուստի ճիշտ է ԶԼՄ-ները հիմնել ոչ թե գովազդի, այլ բաժանորդագրության վրա: Մարդիկ պետք է պատրաստ լինեն վճարել որակյալ տեղեկատվության համար, սակայն Հայաստանում այդպիսի լրատվամիջոցներ գրեթե չկան, քանի որ հասարակությունը պատրաստ չէ դրան»,- խոստովանեց պատգամավորը:
