Չէ՞ որ «Բարգավաճ Հայաստանը» ահաբեկչական կազմակերպություն չէ, որ նրա հետ հանդիպումն անթույլատրելի լինի: Այս մասին հունիսի 25-ին տեսակամրջի ժամանակ ասաց ՄԳԻՄՕ Միջազգային հետազոտությունների ինստիտուտի առաջատար գիտաշխատող Սերգեյ Մարկեդոնովը:
Նրա խոսքով՝ անցյալում Ռուսաստանին մեղադրում էին, որ հարաբերություններ է կառուցում միայն իշխանությունների հետ, իսկ ընդդիմությանն անտեսում է, բայց հիմա երբ աշխատանք է տարվում Հայաստանում քաղաքական ուժերի ամբողջ սպեկտրի հետ, որոշ լրատվամիջոցներում պնդումներ են հնչում, որ Ռուսաստանի դեսպանի հանդիպումը «Բարգավաճ Հայաստան» կուսակցության ներկայացուցիչների հետ Մոսկվայի աջակցության դրսեւորում է:
«Ազգային անվտանգության ծառայության նախկին տնօրեն Արթուր Վանեցյանի եւ Չեչնիայի նախագահ Քադիրովի հանդիպման մեջ նույնպես ոչ մի տարօրինակ բան չկա, քանի որ Վանեցյանը Հայաստանում գործընթացների լեգիտիմ մասնակից է: Մոսկվան հաշվի է առնում անցյալի սխալները եւ հարաբերություններ է հաստատում բոլորի հետ»,- հավելեց փորձագետը:
Նա նշեց, որ երբ մարտի 8-ին Վրաստանում ԱՄՆ դեսպանի նստավայրում քաղաքական փոխըմբռնման հուշագիր էր ստորագրվում ընդդիմության եւ իշխանությունների միջեւ, դրա վրա, չգիտես ինչու, ոչ ոք չզարմացավ:
Սերգեյ Մարկեդոնովը պարզաբանեց, որ շարունակվում է սերտ համագործակցությունը պաշտոնական անձանց մակարդակով. Ռուսաստանի նախագահ Պուտինը Հայաստանի վարչապետ Նիկոլ Փաշինյանի հետ ավելի շատ հանդիպումներ է անցկացրել, քան նրա նախորդի հետ, ինտենսիվ բնույթ են կրում երկու երկրների ԱԳ նախարարների եւ պաշտպանության նախարարների հանդիպումները: «Մոսկվան երբեք չի խոսել այն մասին, որ Հայաստանի իշխանությունները լեգիտիմ չեն, ինչի վրա զարմացել են նույնիսկ արեւմտյան լրատվամիջոցները: Ռուսաստանը ճանաչել է Փաշինյանի իշխանությունը, որովհետեւ Մոսկվայում հասկանում էին, որ նրան ժողովուրդն է աջակցում: Դա գուցե միամիտ աջակցություն է եւ որոշ դրական պահերը գերագնահատված են, բայց դա ձեր երկիրն է»,- ասաց քաղաքագետը:
Մարկեդոնովի կարծիքով՝ կարելի է գրանցել, որ տեղի է ունենում հայկական իշխանության լանդշաֆտի լուրջ վերափոխում: «Ձեւավորվում է ընդդիմություն, որի առաջնորդը կտրվել է նոր իշխանություններից եւ կապված չէ նախկին իշխանությունների հետ: Խոսքը Վանեցյանի կուսակցության մասին է: Ամեն դեպքում, հիմա ժողովրդի աջակցության առումով Փաշինյանի համար առայժմ ամենաշահավետ իրավիճակն է, բայց ժողովրդականությունը հավերժական չէ, առավել եւս Հայաստանում, ինչպես ցույց է տալիս առաջին նախագահ Լեւոն Տեր-Պետրոսյանի, «Ժառանգություն» կուսակցության նախկին ղեկավար Րաֆֆի Հովհաննիսյանի եւ մյուսների փորձը»,- ամփոփեց նա:
Նշենք, որ «Բարգավաճ Հայաստան» կուսակցության եւ նրա խորհրդարանական խմբակցության ղեկավար Գագիկ Ծառուկյանին մեղադրանք է առաջադրվել մի քանի քրեական գործերով:
Այս ֆոնին Հայաստանում Ռուսաստանի արտակարգ եւ լիազոր դեսպան Սերգեյ Կոպիրկինը հանդիպում էր ունեցել Հայաստանի Ազգային ժողովի բոլոր խմբակցությունների ներկայացուցիչներ հետ: