Կարսում գտնվող հայ եւ թուրք լրագրողներից կազմված խումբը հանդիպել է ճարտարապետ Ալի Իհսան Ալընաքի հետ, ով միեւնույն ժամանակ ղեկավարում է Կովկասյան մշակույթների հետազոտական կենտրոնը:
Ինչպես տեղեկացնում է NEWS.am-ի թղթակիցը Կարսից, քուրդ ճարտարապետը անդրադարձել է հայկական Անիում եկեղեցիների եւ պատմական շինությունների առջեւ հայ եւ Հայաստան անվանումների բացակայության խնդրին՝ նշելով, թե այդ ամենը քաղաքական նպատակ է հետապնդում: «Թուրքական իշխանություններն հայ եւ Հայաստան անվանումները միտումնավոր չեն գրում: Դա կապված է Թուրքիայի` Հայկական հարցում որդեգրած քաղաքականության հետ: Թուրքիան Հայաստանի դեմ իրականացնող քաղաքականության մեջ որդեգրել է Հայաստանին բանի տեղ չդնելու գաղափարը: Թուրքիան այս քաղաքականությունը սկսել է 1915-ի իրադարձություններից հետո՝ որդեգրելով մերժողական քաղաքականություն:
Իմ կարծիքով՝ Անիում հայկական մշակույթային արժեքների դիմաց գրվող անվանումների խնդիրը կարող է լուծվել հայ-թուրքական հարաբերությունների կարգավորման դեպքում: Սակայն այդ ամենը չի լինի, քանի որ Թուրքիան վերջին երկու տարում փորձում է Անին թուրքականացնել՝ հենվելով ոչ գիտական հիմքերի վրա՝ այն անվանելով Անը (թուրքերեն՝ պահ, ակնթարթ): Պետությունը սրանով իրականացնում է ժողովուրդների միջեւ խաղաղությանը չնպաստող եւ ապատեղեկատվություն տարածող թյուրքականության քաղաքականություն: Ամբողջ աշխարը Անի ասելով հասկանում է հայկական քաղաք: Իսկ Թուրքիայի մշակույթի նախարարությունը փորձում է այն վերափոխել Անը, որպեսզի հայ բառը չհիշատակվի»,-նշել է Ալի Իհսանը՝ շեշտելով, որ հիմնական պատճառը 1915-ի մեծ աղետը չընդունելու հետ է կապված:
Լրագրողներից մեկը հիշեցրել է, որ եվրոպական եւ ամերիկյան մի քանի ծրագրեր նախատեսում են Անիի որոշ պատմական հուշարձանների վերանորոգում, որին ի պատասխան քուրդ ճարտարապետը շեշտել է, թե ինքը չի հավատում՝ Թուրքիայի կողմից այդ հուշարձանների վերանորոգման խոստումների անկեղծությանը: «Այդ ամենը Թուրքիայի վրա ճնշման արդյունք է, որը Թուրքիան ստիպված ընդունել է` պարզապես օրվա խնդիր լուծելու համար: Անին Կովկասյան ժողովրդի համատեղ ժառանգությունն է եւ բացի հայկական հուշարձաններից եւ արժեքներից պետք է հիշատակել նաեւ մյուս ժողովուրդների արժեքները»,-շեշտել է քուրդ ճարտարապետը: